Car ascoltatores e lectores

Forsan vos ja poteva accostumar vos a mi intention de presentar le persona interviewate o parlante in le precedente emission legente un obra litterari in le emission actual - si un tal registration es disponibile de ille. Pro isto proque previemente le interview con Ferenc Jeszenszky era presentate, ora in le septime podcast de Radio Interlingua le redaction presenta de novo Ferenc Jeszenszky, legente le "Elemento mancante" de dr. Alexander Gode von Aesch, le ultime director de recercas de IALA, que standardisava e publicava interlingua. Le novella es legibile parallelmente con le registration vocal in le libretto "Dece Contos" de Alexander Gode, que pote esser comprate al Servicio de Libros UMI. Ferenc Jeszenszky legeva iste obra 24 annos retro, in Taastrup, in le conferentia international de interlingua in Danmark, 1985, ante le microphono de Thomas Breinstrup.

A causa que de novo Ferenc Jeszenszky assecura in su persona le relation hungare, io de novo ha seligite musica hungare in connexion con isto. Iste vice musica folkloric hungare, sonate in clubs de dansas de Budapest, per instrumentos authentic e in stilo authentic, como illo ha essite sonate in le villages. Le táncház-es (clubs de dansas folkloric) se creava in le 1970s in Budapest, per juvenes urban, como un movimento "revival". Isto se appella "táncház mozgalom" - movimento de clubs de dansas, ubi juvenes dansa e insenia le dansas folkloric hungare sin cambiar los, sin conformar los al leges del scena, solmente pro proprie amusamento, a un musica stilisticamente equalmente authentic. Iste civil movimento cultural era un resistentia passive contra le potentia communista, que non appoiava initiativas civil national ideologicamente distante del "internationalitate" del communismo. Io mesme sona in tal gruppos musical de folklore hungare, ma iste vice io vos presenta un altere gruppo de Budapest per un registration de su album, que se faceva in un tal club de dansas, assi le ruitos e sonos del humor e de dansar se audi tamben.

Post iste parte io presenta alicun actualitates de interlingua, inclusive le apparentia del libro historic del movimento de interlingua, scribite per Ingvar Stenström con le titulo "Interlingua e su promotion durante 50 annos".

Al occasion que le libro ha essite publicate (e pote esser comprate per Lulu.com), Thomas Breinstrup ha facite un interview con le autor. Vos pote ascoltar iste interview post le

musica folkloric svedese, que vole esser un referentia a lo que Ingvar Stenström es un svedese. Io presenta un poco le instrumento national svedese nyckelharpa, i. e.: harpa de clave, que previemente era divulgate in tote le Scandinavia. Naturalmente io presenta un fragmento musical folklor(ist?)ic sonate per iste interessante e unic instrumento nyckelharpa.

Io spera, que anque iste emission de Radio Interlingua es informative e divertente pro vos.

Illo se audi o se discarga directemente de ci:

http://www.interlingua.com/node/601

Sur le mesme pagina vostre commentarios textual es anque benvenite!

Péter Kovács
le redactor

--
Archivos e disabonar: http://listserv.icors.org/archives/INTERLNG.html