Io habeva surprisa a apprender que E. Clark Stillman veniva de Eureka, Utah.
Isto es hodie un parve village in le montanias al sud e west de Salt Lake
City, Utah in le Statos Unite. Illo es locate justo ultra le passo del
montanias super le strata federal 6-50. Quando on conduce su auto trans
le village, on vide pauc activitate. Il ha alicun pauc stationes de
gasolina, e on sovente stoppar a istos a replenir le gasolina in le
auto ante conducer plus, proque isto es un region deserte, e le proxime
stationes de gasolina es circa 100 millias plus distante in le urbo de
Delta, Utah, que es al margine del deserto que se extende al west al
bordo del stato de Nevada e ultra isto.

Mais al commenciamento de iste seculo le citate de Eureka esseva un
major citate del stato de Utah. Le auro, argento, plumbo e zinc ha essite
discoperite in filons ric in iste montanias, e plure milles de gentes
ha venite a laborar in le nove minas o al molinos ubi on pulverisava
le mineral ante poner lo in grande bassinos, per le qual on percolava
solutiones chimic que lixiviava le auro del mineral.  Circa 1925 le
citate esseva ancora un citate minor mais importante al economia del
nove state de Utah, proque su minas esseva producente multo.  Un bon
gymnasio e schola elementari esseva construite, e il ha plure bon
casas in le citate in le canons in que esseva situate le citate.  Potesser
Stillman esseva de un bon familia, un patre qui esseva un administrator
de un mina o molino, o le proprietario de un magazin. (Qui sape?)

Eureka es lo que Archimedes ha critate quando ille "discoperiva" un via
a determinar le puritate de auro in un cosa, significante "Io ha discoperite
lo!", e isto esseva le crito del cercator de auro quando ille discoperiva
un filon o deposito ric del auro, e pro isto le citate es nominate.

Mais plus tarde le mineral ric non esseva extrahite plus, e le citate ha
lentemente morite--non totalmente como alicun villages abandonate in
le montanias e desertos del West. Il ancora ha le stationes de gasolina,
e parve specieras pro le viagiatores qui conduceva lor autos per le
deserto del est del Statos Unite, a California, 700 millias al west.

Eureka ha plure connexiones a mi vita.  Mi patre habeva un studente in
un curso in le inseniamento del subjecto del biologia. Isto esseva le
principal del gymnasio in Eureka, e mesmo post le Guerra Mundial il
ancora habeva alicun commercio in le citate.  Io anque rememora plure
visitationes al citate con mi patre, e quando io esseva un puero io
habeva abonate me al Societate de Mineralogia, e nos ha facite plure
viages al campo in le region circa Eureka, ubi nos poteva discoperir
ancora le mineral de arsenic. E plus tarde io esseva ducite a un
region presso Eureka ubi on trovava le belle agata, plure fragmentos de
que io ancora possede con le intention de fabricar lo in connection con
mi interesse in le lapidario.  Mais durante iste excursiones nos semper
stoppava al fin del die a un speciera in Eureka pro comprar le gelato
e a replenir nostre gasolina ante le viage a casa in Salt Lake City.

Stan Mulaik