SURF A SERIO
Le popularization del Internet cambia le forma e le contento del deberes de casa
(Andra Veiga)
Genitores qui ha filios in bon schola particular lo sape: material basic hodie
es quaderno, libro, penna e computator ligate al Internet. Multo ultra le
function initial de producer coperturas elaborate pro travalios scholar, le
computator ha devenite instrumento fundamental de recerca e adjuta in le famose
deberes de casa — que, de su latere, deveni plus rapide e agradabile sur le
schermo del computator. In le Statos Unite, 95% del studiantes naviga sur le
Internet al minus un vice per septimana. In Brasil, ben que il non ha
statisticas a respecto, es probabile que le numero sia equal inter le alumnos
del classe medie-alte. "Practicamente non se face plus recerca sin un
consultation al rete", attesta Reinaldo Espinosa, vice-director del inseniamento
fundamental del Colégio Santa Cruz, de São Paulo. Le demanda ha crescite tanto
que le Instituto Brasileiro de Geografia e Estatística, IBGE, lancea iste
septimana le IBGE teen (http://www.ibge.gov.br/ibgeteen/index.html), sito
dedicate a studiantes, con mappas, tabulas e informationes actualizate super le
pais in un linguage accessibile al pueros. "Durante le tres menses de test le
demanda ha essite grande", informa Marcio Imamura, un del responsabiles pro le
projecto.
In materia de uso del Internet in le deberes de casa, il es le schola qui curre
detra le alumno. Sin que quicunque les monstrava le cammino del petras, le
puerada ha discoperte que, con un clic de mure, illes habeva accesso a un
volumine de informationes multo major que in le disanimante encyclopedia
domestic. Altere clic e la era, sin stilo o papiro-vegetal, le mappa o le animal
juste pro illustrar le lection. Toto preste, mancante solo imprimer. Tanto
preste que le scholas, preoccupate con tante copia, ha comenciate a investir in
un union creative inter deberes de casa e computator. Le professores ora orienta
le alumnos a facer recercas plus elaborate in le Internet e intercruciar
differente informationes e ideas super le themas in studio. Le resultato es
animante. "Io ha facite un travalio super le presidentes de Brasil, con
articulos pro e contra cata un de illes", se vanta Raphael Schimitt, 12 annos,
alumno del 7me serie del Colégio Positivo, de Curitiba. Ultra indicar le melior
procedimentos pro obtener le maximo del Internet, alcun stabilimentos ja
distribue le lection de casa sur dischettos. "Io porta minus peso in le rucksack
e non perde horas copiante exercitios ab le quadro", constata Marília de Souza
Paes, 16 annos, qui cursa le 2de serie del 2de grado del Colégio Bandeirantes in
São Paulo. Le genitores, de lor latere, gania in tranquillitate. Pro le ben de
totes, illes ha minus chance e necessitate de interferer in le lection del
filios.
MUSICA E SUPERMERCATO -- Le Centro Educacional da Lagoa, CEL, de Rio de Janeiro,
forni iste anno un CD-ROM que permitte al alumnos revider in casa le contento
del classes e facer recercas in sitos selectionate pro cata travalio scholar.
"Per medio del selection, nos evita que le alumno se perde in le cerca e imprime
information inutile", explica Laura Coutinho, directrice del schola. Le
paulistas Santa Cruz e Bandeirantes offere salas de conversation, le chats, al
alumnos pro que illes realiza travalio in gruppo sin exir de casa. Le
studiantada, como il non poterea non esser, adora. "Leger textos mimeographate
es multo enoiose", commenta Bernardo da Costa Fontenelle, 13 annos, alumno del
7me serie del CEL. "Io ha passate a studiar plus post que io ha comenciate a
surfar per le sitos." Como tote novitate respectabile, le thema provoca
polemica. "Computator ha devenite un maquina de xerox modernose", tira Edgar
Flexa Ribeiro, director del Colégio Andrews, un del plus traditional de Rio.
Ribeiro, in iste caso, rema contra un currente irreversibile. Qui ha computator
va usar lo in le lection de casa, mesmo que disguisatemente. A causa de illo, le
ideal es incorporar lo al inseniamento in le melior forma possibile.
Le accesso a informationes superactualizate e le dynamica del deber electronic
ha habite le effecto collateral de render le alumnos ancora plus impatiente con
le lection de casa traditional. Resultato: mesmo sin pensionar de un vice pro
sempre copias e memorizationes, multe cargas que non exige le computator ha
devenite plus proxime al quotidiano del infante e del juvene. Per suggestion de
su professor de studios social, le paulista Vinícius Magnun, de 11 annos, qui
cursa le 5te serie al Colégio São Luís, ha ite al supermercato pro discoperir le
composition del alimentos. "Io ha examinate le etiquetta de circa 100 alimentos
in latta", ille conta. Al Positivo, de Curitiba, le alumno es orientate a
seliger un musica que le place, tirar ab illo tote le adjectivos e substantivos
e formar nove phrases con illos.
DISPUTA IN CASA -- Recercas de campo e activitates ligate al universo del
studiante es optime manieras de eliminar le effecto soporifere del deberes de
casa, mais il ha nihil como un computator pro stimular un discipulos
disinteressate. Illes qui ancora non dispone de un machina se arrangia como
possibile. Le curitibano Renan Bernardo de Paula, 13 annos, un lamentose
sin-Internet, recurre al computatores del collegas. "Si non, mi deber non resta
tanto bon quanto le lore", ille explica. Le uso scholar es le grande pretexto
del puerada pro convincer le genitores a comprar un ingenio. "Nos iva tote die
facer le deberes al bureau de papa", conta le mineira Kátia Regina Gandra, 15
annos. Habente ganiate como presente un computator in le anno passato, illa, le
sorores Kelly e Karina e le cosino Ricardo ora resta in casa, disputante cata
minuta ante le monitor. "Le prioritate es de qui ha lection pro le die
sequente", dice Kátia. Quando totes lo ha, il es le chaos. Ancora assi, illo es
melior que confrontar le monotonia del libro, quaderno e penna. #
--
Traducite ab: Revista VEJA, edition 1587, anno 32, nº 9, 3 de martio de 1999.
"paulista" = persona nascite in le stato de São Paulo.
"mineiro" = persona nascite in le stato de Minas Gerais.
"curitibano" = persona nascite in le stato de Curitiba.
--
ENSJO : EMERSON JOSÉ SILVEIRA DA COSTA
Homepage : http://www.nautilus.com.br/~ensjo/
UIN ICQ : 713833
INTERLINGUA - lingua auxiliar international
Info : http://www.interlingua.com/europa/queesinterlingua.html
Brasil : http://www.nautilus.com.br/~ensjo/ubi/
|
