Cellus ha scribite:

"Hancock es un ben cognoscite nomine in Svedia. Mesmo ci in Uppsala.
Ego ha sempre credite que le nomine exemplo era John Doe."

"John Doe" non es le mesme cosa como "John Hancock." "John Hancock"
es un colloquialismo que significa "signatura," perque John Hancock, le
presidente del Secunde Congresso Continental (le cual ha declarate le
independentia del Statos Unite) ha signate le Declaration de Independentia
con un signatura molto grande, a fin que (como ille ha dicite quando ha signate)
"Corpulente George [le rege George III] in London pote leger lo sin su berillos!"
Incidentalmente, un del plus alte edificios del mundo es le John Hancock Turre
in Chicago, que recipe su nomine de un compania de assecurantia, le John
Hancock Life Insurance Company. Quando io era un puero le slogan usate
per iste compania in su annuncios era "put your John Hancock on a John
Hancock life insurance policy" que in anglese significa "pone su John
Hancock [signatura] in un polissa de assecurantia de vita del John Hancock"

Un "John Doe" es completemente differente. Le nomine John Doe es usate pro
un homine le nomine de qui non es cognoscite. Per exemplo, in 1979, al etate
de 16, io ha sido arrestate in un protesto contra le reactores nucleari in Indian
Point (minus que 40 kilometros al norte del Citate de Nova York). Perque io
refusava a dar mi nomine, le accusation legal contra me ha usate le nomine
"John Doe." Ma io non era simplemente "John Doe" perque multe personas in
le mesme protesto etiam refusava a dar lor nomines: io era accusate per le policia
como "John Doe #49." 48 homines qui non dava lor nomines era arrestate ante
me! Le feminas qui non dava lor nomines era arrestate como "Jane Doe," le
nomine que es usate in le casos de feminas anonyme.


Amicalmente,

"Julio Doe"