Io crede que le creation de plure foros pro discussion es bon.  Totevia,
mi experientia de dece annos in interlng esseva que le novicios es
sovente le unes qui initia le discussiones grammatic e del vocabulario.
Il non importa que es le subjecto de discussion currente, si alcuno
pensa que un altero usa un parola impropriemente, ille critica, alora,
in mi caso al minus, quando io usa un parola como 'caciar' in loco de'
'chassar' (proque io pensa que illo es impropriemente introducite in
interlingua del occidental), alcuno vole corriger me.  Io ha essite un
interlinguaista plus longe que 90% del personas aqui (de 1954), e io ha
comenciate con interlingua e non alcun altere lingua auxiliar, e ha
apprendite de interlingua de Dr. Gode personalmente, e io non suffere
criticas de un puncto de vista alquanto mancante in le experientia que
io ha habite.

Nos jam ha plure 'foros' in le interrete, mais solmente interlng e
coollist sembla haber regular participantes.  Como Jasef dice, il ancora
ha troppo pauc personas pro sustener plus listas que duo o tres o quatro.

Io suggere que nos comencia con duo listas, interlng, e un altere
como coollist pro le discussion del grammatica, vocabulario, etymologia,
technicas e theoria de interlingua, ambe listas con ligamines a
www.interlingua.com.

Alora, si alcuno pensa que alcuno usa parolas incorrectemente a
interlng, que ille indica a interlng que ille vole corriger, o discuter
le uso de certe parolas al altere lista, scribente un message breve.
Alora ille e le personas interessate in le question pote vader a aquelle
lista pro discuter lo in loco de continuar facer lo a interlng.  Le
facile accesso al secunde lista esserea importante pro facilitar tal
discussiones.

Equalmente un attitude del tolerantia de differentias es importante
in adjutar resister le tentation de criticar un altero.

In tempore, possibilemente altere subjectos va devenir dominante e un
nove foro pro illos pote esser create, si on pensa que troppo del
discussion es super un tal subjecto.


Stan Mulaik

--
Pro disabonar te: http://listserv.icors.org/archives/INTERLNG.html