Car ascoltatores de Radio Interlingua; car lectores!

Nove nomines ha apparite in le lista del litteratura original e traducite de interlingua. In le ultime emission de Radio Interlingua pro le anno 2012 vos pote ascoltar un poema del autor brasilian Goncalves Dias traducite e recitate per Erick Fishuk, qui vos ja cognosce de un previe podcast. Iste poema ha un rhythmo tanto musical, que io tosto ha cercate un musica de Csaba Kocsis con le mesme rhythmo e lo ha ponite justo post le poema.

Recentemente appareva in le spatio cybernetic un poeta svedese in interlingua, con le pseudonymo artistic Marcus Scriptor. Io recommenda su poemas, que son scribite originalmente in interlingua, assi inricchiente le litteratura original de interlingua. Su weblog se trova sub le adresse http://poemasepensatas.blogspot.se . Ma ille tamben publica su poemas como registrationes audio in Youtube . De illos io ha seligite ora un. Isto appare al fin del emission. 

Ma inter iste duo partes litterari, finiente le longe interview presentate in le precedente emissiones, Petyo Angelov evaluta le previe conferentia international de interlingua in 2011 in Chepelare, Bulgaria; e postea io mesme parla un poco super le sequente conferentia, que essera organisate in Freiburg, Germania, al fin de julio e le initio de augusto in 2013.

Le podcast pote esser discargate directemente de ci: http://www.interlingua.com/node/958 .

Tote le podcasts de Radio Interlingua pote esser discargate del pagina http://www.interlingua.com/radio .

Per iste emission io, le redactor de Radio Interlingua vos desira un felice nove anno!

Péter Kovács


--
Pro leger le archivos e pro modificar o cancellar le subscription:
http://listserv.icors.org/archives/interlng.html