Salutes a omnes,

Mi participation in le conferentia international in Gdansk me ha inspirate
in le conversation directe in interlingua.

In Internet existe un systema de conversation directe cognoscite sub le
nomine IRC (Internet Relay Chat). Iste systema es plus vetere que le WWW e
sin graphicos, ma totevia (o, plus tosto, per consequente) extrememente
functional e effective.

Le conversation per IRC es quasi tanto directe que le conversation per
telephono o incontro personal, ma facite per le claviero. Es costumari
participar sub un alias ("nickname") ma on pote naturalmente usar su ver
nomine.

Existe multe retes IRC independente, non connecte con le un le altere, e
totes noncommercial e sin reclamos. Cata rete ha multe canales de
conversation, cata uno dedicate a un certe topico (o, in alcun casos, a
nulle topico specific...) Le nomines de canales IRC semper comencia con "#".

Personalmente io quasi frequentemente participa in alcun canales in le
parve ma multo amical rete IRC "Starlink-IRC": http://www.starlink-irc.org/
(sito informational in anglese) Iste rete es plus regulate que multe
alteres e non admitte themas offensive o illegal. Le administratores es
active e cordial.

Un canal relativemente nove in Starlink-IRC es #international. Isto es un
canal multilingue cuje objectivos principal es le conversation in linguas
non-anglese, e le auxilio con le traduction de un lingua a un altere.

Io suggere que #international in Starlink-IRC esserea un multo bon loco pro
nos interlinguas a incontrar se, non solmente pro confabular inter nos in
interlingua, ma anque pro explicar que es interlingua a altere interessatos
que incontra le canal - e in addition, naturalmente nos pote parlar super
tote altere linguas. Assi nos pote combinar le incontro amical con le
diffusion de interlingua. Io ha parlate con le operatores del canal e illes
supporta iste idea.

Pro participar in un modo simple, usa le facilitates Java de Starlink-IRC
directemente in tu navigator web; vide le sito citate supra pro plus de
information. Infortunatemente, ben que le uso del cliente Java es rapide e
facile (si on ha un computator assatis avantiate), non es effective pro uso
avantiate - per exemplo, es impossibile copiar/collar le texto de un
conversation pro salvar lo alterubi. Conversatores frequente es consiliate
de discargar un ver programma IRC pro lor computator specific, p.ex. mIRC
pro Windows o Snak pro Macintosh.

Io suggere 20:00 GMT pro un bon tempore de incontro quotidian, specialmente
al weekends. Io va tentar esser presente in le canal circa iste tempore a
partir de deman, o le die post deman, e io spera de incontrar alcunos de
vos. Si tu junge le canal e nulle persona es presente, vale le pena
attender e facer un altere cosa (e-posta, web, etc.) intertanto.

Vos semper incontrara "CStar". Nota ben que CStar non es un persona ma un
robot (programma computatorial presente al servitor) cargate con tener
functional le canal e fornir certe servicios al operatores ("ops" o
"hosts"). CStar non participa in conversationes.

Si le participation es sufficiente, io debera crear un pagina web specific
super #international in interlingua. Naturalmente, io es disponibile pro
dar ulterior informationes o consilios.

- Martijn ("McDutchie" in IRC)