Car co-batalantes interlinguista! 

(uh, isto succedeva un poco in le stylo de Allan Kiviaho... :-D )

Hodie in le vespere io ha vidite un reporto del television regional super un conferentia del 

Centro European de Linguas Vivente

organisate in Szombathely (in bon interlingua /latino/: Savaria, in le germano Steinamanger, in le croato Sambotel; trovabile in le mesme region como mi urbe Zalaegerszeg). 

Le institution ha su sede in Graz, Austria (le plus proxime citate del plus grande citates austriac presso mi urbe). 

Alicun representante ha dicite, que le equalitate del populos, nationes e linguas es importante pro illos e illes vole avantiar le interaction, le cognoscentias reciproc del nationes. Ille ha dicite anque, que omne le linguas es equal pro illes, e le grandes, e le micres (totevia omne le intervistatos parlava un sol lingua: le anglese...). Totevia, malgrado omne iste argumentos:

NULLE REFERENTIA SE AUDIVA SUPER ULLE LINGUA AUXILIAR CONSTRUITE! Al minus nulle referentia in le reporto (assatis longe), ma io suppone, le institution mesme rejecta tote le initiativas de tal sorta; como infortunatemente omne le tal institutiones IO NON SAPE, PROQUE; nam secundo me justo tal organisationes poterea ager qualcosa pro tal linguas (preferibilemente pro interlingua), adjutar lo e le lingua poterea adjutar los (poterea esser usate pro tal scopos de iste institutiones) equalmente. (Olim io ha probate facer le representantes de un organisation amical cultural finnese-hungare, habente visitate anque mi urbe in le quadros de su tour national cognoscer interlingua posteriormente in emails, ma in van. Illes usa obviemente le duo linguas finnese e hungare equalmente, anque le hungaros le finnese e inversemente, dependente del situation; illes non besonia un tercie lingua, io suppone; pro isto illes non, o neutralmente reageva a me - .)

Nonobstante le representante hungare del Centro European de Linguas Vivente ha dicite importante, e interessante cosas, digne de memorar:

Omne le parentes del scholares face lor infantes apprender le anglese e obviemente le plus juvene generation se orienta univocamente al anglese, como le lingua estranier a apprender. 

(Nos ja cognosce, lo que ille ha dicite anque, que inter le hungaros trova le minus personas parlante alicun lingua estranier. Ille ha dicite anque, que le systema de instruer linguas estranier in le scholas es false in Hungaria: le practica es, que le scholares de scholas medie continua apprender le linguas, le quales illes ha comenciate apprender in le schola basic, e non un altere secunde lingua.) Ma le practica monstra, que 

cognoscer exclusivemente le anglese non es sufficiente, e on debe aperir se etiam verso altere linguas (quasi ille habeva dicite: regiones, culturas...). 

Un altere representante de Graz ha addite al thema mesmo lo que il serea le plus ben pro totos 

cognoscer 1. le anglese 2. e alicun lingua vicin 

(pro Hungaria ille ha mentionate le slovaco e le sloveno, como exemplos)

Ben que omne le intervistatos parlava le anglese, io videva in le film, que le projection durante le conferentia occurreva in duo linguas (anglese e francese); al minus assi le hegemonia del anglese non se realisava.

Il se tractava ancora in le reporto super le linguas minor (illos de minoritates), ma isto non es tal importante viste nostre thema(tica. Vide in iste contexto lo que io scribeva supra super lo que illes pensa super le "equalitate del linguas").

Que vos pensa? Esque le nomine "Centro ... de Linguas _VIVENTE_" non es un exclusion intentional de linguas "artificial" (e le latino) e assi un base de rejectar omne le projectos, initiativas de tal sorta? (Considera, que p. ex. in Hungaria iste terminologia vivente - morite es applicate falsemente pro le linguas natural e construite per le gentes general, non professional - non linguista.)

Si vos es interessate in saper plus super le institution, vide le pagina http://www.ecml.at/ (anque isto in anglese e francese).

Péter Kovács

=====================================================Pro disabonar te del lista, invia un message a
[log in to unmask] con le texto:

  UNSUBSCRIBE INTERLNG

o visita le sito del lista:

  http://maelstrom.stjohns.edu/archives/interlng.html
=====================================================Visita le sito official del Union Mundial pro
Interlingua:

  http://www.interlingua.com/
=====================================================