2nde RFD pro un nove hierarchia Europe/a.* le 4 januario 2001.
==============================================================

MODIFICATIONES desde le 1me RFD

* Addite nove proponentes
* Nove option de nomine de nivello superior: "europa"
* Cambios in le lista de gruppos initial pro consistentia lingual
* Addite nove section pro stimular discussion re structura de
  subhierarchias
* Nove propositiones re le administration del hierarchia


OBJECTIVO e loco de discussion.

Le objectivo de iste RFD es incoragiar usatores potential del nove
hierarchia a continuar discuter detalios importante que debe esser
fixate ante le data de lanceamento. Le discussion deberea haber loco in
le gruppo international "news.admin.hierarchies" in le lingua de vostre
preferentia. Lectores anque es incoragiate a inviar copias de iste RFD a
hierarchias de nationes e linguas europee, con traductiones si
possibile, e con le indication que responsas deberea esser inviate a
news.admin.hierarchies.


PROPONENTES

Le hierarchia Europ[a/e].* actualmente es proponite e promovite per tres
personas:

Andy Roberts <[log in to unmask]>
Mario Benvenuti <[log in to unmask]>
Martijn Dekker <[log in to unmask]>

Personas interessate in assister pote contactar un del proponentes.


RATIONAMENTO

Un nove hierarchia de gruppos de novas pro themas que concerne le
continente de Europa es besoniate. Isto facera possibile le discussion
inter gente de diverse paises europee. Importantemente, illo sera un
hierarchia multilingual, e nulle singule lingua habera ulle stato
privilegiate.


NOMINE

Le prime RFD offereva duo selectiones, europe.* e europ.*. Le option
europ.* ha incontrate multe opposition e plure personas ha suggerite
europa.* in vice. Europa es le nomine de nostre continente in le
majoritate de linguas europee, e anque es facile a recognoscer pro
anglo- e francophones. Le proponentes pensa que cata uno del altere
alternativos, como eu.*, euro.* e eunet.*, ha qualque meritos, ma il
anque ha bon argumentos contra illos.

Dunque, in iste 2e RFD nos spera que on potera facer un decision inter
le duo melior optiones:
a) europa.*
b) europe.*


GRUPPOS INITIAL

Le lista de themas suggerite in le 1me RFD era positivemente recipite,
ma on ha pensate que le nomines era bastante arbitrari. Il non es un bon
idea miscer linguas europee in le nomines de gruppos de novas, ma illos
anque non deberea esser in anglese, proque isto compromitterea le
principio del neutralitate linguistic.

In vice, nos propone nomines adoptate de interlingua
<http://www.interlingua.com/>, un lingua neutral pan-europee que era
designate per un equipa de linguistas pro esser comprensibile pro un
maxime quantitate de personas. Istos es formas international clar e
non-arbitrari que quasi omnes comprende a prime vista, sin respecto a
lor linguas europee maternal.

europa.admin
europa.admin.information (moderate)
europa.agenda
europa.commercio
europa.ecologia
europa.general
europa.migration
europa.politica
europa.politica.union
europa.politica.union.euro
europa.sport
europa.sport.football
europa.technologia
europa.telecom
europa.viages


Structura de SUBHIERARCHIAS

Omnes ha lor proprie opiniones diverse re le optime structura pro
arrangiar le gruppos intra subhierarchias. Nos propone duo strategias
general a considerar:

a) Crear le gruppos initial como listate ci supra, lassante le altere
gruppos e subgruppos a esser discutite in europa/e.admin post le
establimento del hierarchia.

b) Crear un serie de subhierarchias, cata uno con un gruppo *.general, a
fin que le structura europ[a/e].* pote expander se a un maniera
predeterminate.


ADMINISTRATION

Durante le prime RFD, le suggestion de un commission eligite, con sedes
reservate pro cata uno del paises plus grande, e un altere section pro
omne parve paises, era considerate troppo ambitiose e problematic.

A fin de poter initiar le projecto, nos propone le methodo sequente:

Un lista de e-posta sera establite a fin que voluntarios pote contribuer
lor habilitates pro assister in render successose le hierarchia.
Expertos e technic e linguistic sera requirite pro cooperar pro le
lanceamento de europ[a/e].*. On debera scriber documentos e sequer
proceduras a fin de assecurar que le nove hierarchia cresca e prospera
con un bon propagation trans le servitores de novas.

Le membros del lista de e-posta appunctara qualcuno pro ager como un
administrator e pro crear le lista accordate de gruppos initial al data
de lanceamento. Le passos ulterior requirite pro administrar le
hierarchia sera prendite postea, in accordantia con quecunque methodo de
creation de gruppos que sera decidite.

Iste typo de administration continuara usque a bastante gente usa le
nove gruppos pro poter establir un methodo optimal de administration.


PROCEDURA

Isto es un "Request For Discussion" informal que non conduce a necun
voto formal. Responsas constructive (in quecunque lingua) es benvenite
in news.admin.hierarchies; le Followup-To: es ponite la.

FIN
###
| Interlingua ---------------------------
| --- lingua international neutral ------
| ------- comprensibile a prime vista ---
| ----------- http://www.interlingua.com/