Car amicos,
Plures in le lista se demanda "Esque il non ha feminas inter le
interlinguistas?"  Le responsa es que illas es rar, sed existe.
Illas non sovente collabora activemente - il ha exceptiones -
sed como Kjell R. dice, illas participa al "occasiones social",
cursos e conferentias.
Vidente le multe feminas sur le lista de participantes in Praga 1995,
io scribeva un "serenada", includente in le refrain tote le nomines.
Alcunas del ukrainianas non veniva, sed ecce le canto, pro vostre
"amusamento" (?).  Illo es cantabile secundo le melodia italian
"Serenada de Tanti".Tanti esseva un clown italian (Constantino
Bedini, 1861 - 1900) e le melodia es traditional italian, sovente
cantate per Jussi Bjorling, "le secunde Caruso".
(Attention que le damas esseva tanto numerose
que le refrain del melodia debeva esser repetite duo vices, lo
que differe del melodia original.)
Seniores, vos las revidera al Conferentia in Focsani!

1. Vide, le luna brilla!
Profunde in mi sino
cresce amor a illa.
Audi mi mandolino!

Refr. 1 a
Dulce le sonos,
auree tonos
canta nunc con nos:
"Veni a nos!"        (Le serenadantes se trova sub le balcon...)

Refr. 1 b
Julia, Natalia,
Janny, Amalia,
da nos responsa!
Ubi es vos?

2. Nigre es noct' in Praga
calme se move vento.
Mysteriose maga
conjura sentimento.

Refr. 2 a
Signe e Anja,
Franske e Tanja,
Lith, Frederica,
e tu, Gaëlle.

Refr. 2 b
Anne-Marie
e Tine mie!
Oh, Natalie,
io es ci!

3. Nos jam attende horas
con nostre serenada.
Que vos nunc veni foras
pro un bell' promenada!

Refr. 3 a
Olya, Marina,
Eva, Krystyna,
Valeria, Lidia,
audi vos nos?

Refr. 3 b
Karen, Svetlana,
Alla, Oxana,
Maya e Anna
e Ann-Louise.

4. Troppo rapidemente
passa le nostre vita.
Nemo sera contente
si iste noct' perdite...

Refr. 4 a
Alix, francesa,
Ingrid, svedesa,
Louise e Lene,
"Soror" Madeleine!

Refr. 4 b
Raissa, Victoria,
feminin gloria!
Natalia, historia
- isto deman.

5. Tosto sera matino.
Alba del die nove
chassa un amorino
- e nos a casa move...

Refr. 5 a
Svelte Christine,
oh, Valentina,
Nadya, Christina,
e Erzsébet!

Refr. 5 b
Hildburg e Britta,
nunquam nos quita!
Suisse Anita,
resta con nos!

(Ergo: "interlinguistessas" existe. Quod erat demonstrandum.).
Salutes del culpabile,
Ingvar

Ingvar Stenström,
Vegagatan 12, S-432 36 Varberg, Svedia
Tel. +46-/0/340-15053
<[log in to unmask]>
<[log in to unmask]> <[log in to unmask]>
<http://www.interlingua.com>
ICQ UIN nr. 26993308