Es interessante iste genes que veni solo de un del parentes, como le 
chromosoma Y que veni solo del patre. Existe tamben un information genetic 
que veni solo del matre: le ADN mitochondrial.

Le mitochondrias es organellas de nostre cellulas que forni le energia 
necessari pro le reactiones chimic del cellula. Le curiositate es que 
illos ha un ADN proprie, independente del ADN que existe in le nucleos de 
nostre cellulas -- le genoma human.

Uno suppone que le mitochondria era primordialmente un organismo 
independente que ha essite absorbite per un cellula primitive. Ma le 
cellula non ha digerite le mitochondria -- al contrario, le union ha 
resultate benefic pro ambes. Per le sequentia del evolution, tote le 
esseres pluricellular de hodie porta mitochondrias in lor cellulas.

Le mitochondria se divide independentemente intra nostre cellulas. Perque 
su reproduction es asexual, le ADN remane sempre le mesme, salvo alcun 
mutation. Alcun de iste mitochondrias fini in le ovulos, que es fecundate 
per spermatozoones, que NON porta mitochondrias del patre. Assi le filios 
porta sempre le mesme ADN mitochondrial del matre.

Per examinar le chromosoma Y e le ADN mitochondrial, uno pote facer 
recercas relative al diversification del specie human in le curso del 
historia.

Le character independente del mitochondrias es explorate in un videojoco 
pro le PlayStation appellate "Parasite Eve", ubi illos se revolta contra 
le esseres human. In le initio del joco, tote le personas qui es in un 
theatro entra in COMBUSTION SPONTANEE, quando le mitochondrias in lor 
cellulas libera voluntarimente le energia que illos contine... Filet 
flambé! :^b

Ensjo.