Io pensa que tu attitude verso le education e le inseniantes es
a vices influentiate per tu proprie experientias.

Io ha assistite a un schola elementari pro le instruction de
inseniantes, super le campo de un universitate.  Naturalmente,
io non ha multe experientias de inseniantes qui frappa lor
studentes. Qualcunque inseniante in aquelle schola qui ha frappate
su studentes esserea dimittite. Assi io ha un multo plus positive
attitude verso le education que alteres aqui.  Il es periculose a
generalizar solmente super le base de tu proprie experientia.
Multe personas ha derivate multe beneficio de lor inseniantes e
senti grate verso illes. Isto non es a denegar que alteros ha habite
mal experientias con inseniantes autoritari e punitive. Tu ha
mi sympathia.

Con respecto al religion, io initialmente debe dicer que io non pertine
a un ecclesia. Io non assiste a un ecclesia. Mas le religion como un
subjecto ha semper interessate me.  Io non pensa que le ecclesia
catholic in Checoslovachia in le etate medievo o mesmo ante le
arrivata del communismo es un bon exemplo del religion.  In Boston
on lege hodie in le novas que plus que 1000 casos del abuso sexual per
prestres ha essite reportate e investigate in le diocese de Boston--
per le policia.  Le ecclesia sub su episcopo ha concelate iste
comportamento de lor prestres in iste casos e ha facite nihil pro
advertir su continuation per le mesme prestres.  On dice que isto es
le falta del episcopo a la, que in altere dioceses tal casos es minor.
Nonobstante, on pote dicer que isto es le fallimento de homines.
E isto me pare ha ration.

Io non pensa de me mesme como un christian, ben que io crede que Paul
Tillich es mi favorite theologo.  Su approche al religion esseva multo
sophisticate, quasi psychologic. Religion concerne le preoccupation con
cosas ultime, p.e. proque il ha alque e non nihil, ha nostre vitas
significantia, que debe io facer, que es le morte?  In un senso
metaphoric 'Deo' es le solution a tal questiones, mais Deo pro Tillich
non esseva un cosa que existe, non un cosa, non un fortia in le universo.
Le sol cosa que ille diceva super Deo es que Deo es le fundamento de
esser,  que il ha alque e non nihil, le 'poter de esser'.  E pro Tillich
le idolatria esseva confunder un cosa finite con tu preoccupation ultime.
E le criterio del idolatria esseva Jesus super le cruce, Deo qui se
sacrifica pro salvar te. Nulle idolo pote sacrificar se pro te.  Tu debe
sacrificar te pro le idolo.  E institutiones, e libros, e tote cosas
finite pote devenir idolos, levate al nivello de un preoccupation ultime.
Le fundamentalismos es o jam idolatrose, o multo proxime a lo. Equalmente
es le communismo e le fascismo formas del idolatria, proque creder o non
creder in le existentia de un esser nominate 'Deo' non importa, si tu
tracta le objecto de tu effortios como un preoccupation ultime que require
que tu te sacrifica pro illo mais que non se sacrifica pro te.

Ora un facto interessante super Tillich es que un de tu libros habeva
le titulo "Time and Eternity" (Le tempore e le eternitate). Post su morte
su sposa ha scripte su proprie autobiographia, con le titulo "From Time to
Time" (De tempore in tempore). Illa ha habite un affaire con Tillich e
ha partite de su sposo pro viver con Tillich.  Ambe illa e ille habeva
per lor maritage (que finalmente occurreva post su divorcio) un
numero de amantes sexual. Illa esseva un artista, e lor maritage esseva
extraordinari, bohemic a ver dicer.  Illa reconta que ille frequentemente
seduceva feminas, de facto ille ha seducite la con su intellecto, su
cognoscimento del arte, e su capacitate monstrar interesse in illa.

Mas a concluder isto, Tillich esseva capace de balanciar quasi opponite
conceptiones in su mente--religion e atheismo, pietate e bohemia,
un profunde interesse in le theologia, e un profunde interesse in feminas.
Non multe personas es capace de tal balancia.  Su religion ha essite
probate in le trencheas de Guerra Mundial I como un cappellano con le
truppas german, ubi ille ha vidite le morte, terror a su pejor, e ille
ha essite capace de construer un fide, que esseva totalmente realistic
sin qualificationes, in le poter de esser.

Cordialmente,

Stan Mulaik