Car Interlinguistas:

     Le cinquantesime anniversario del Plan Marshall me face
pensar, per prime vice, a un similaritate instructive inter le
situation in Europa a ille epocha e un recession o depression
ordinari (conjunctural o "cyclic") intra un pais.  A ille epocha
le povressa del periodo postbellic esseva exacerbate per
obstaculos al commercio non solo inter Europa e le resto del
mundo ma anque inter le varie paises europee misme.  Iste
obstaculos esseva le cursos de cambio fixate a nivellos
incorrecte e mantenite per varie controllos, combinate con un
assi diagnosticate insufficientia de reservas international (auro
e dollares) pro saldar deficits in le balancias de pagamentos.
Le governamento de cata pais in iste situation lo considerava
necessari imponer controllos super importationes (que esseva le
exportationes de altere paises) e super le movimentos de
capitales pro conservar su scarse receptas de moneta estranie.
Un grande numero de accordos bilateral de commercio non
constitueva un palliativo adequate in iste situation.  On cercava
introducer regimes de commercio e pagamentos plus multilateral,
effortios que eventuava in le Union Europee de Pagamentos in 1950
e le restoration de libere convertibilitate de monetas in 1958.
Un merito in le adjuta per le Plan Marshall esseva facilitar iste
passos a liberalisation monetari e commercial.
     Le problema ante le liberalisation esseva precios
(specialmente cursos de cambio) incorrecte e insufficientia, a
iste precios incorrecte, de moneta, specificamente de moneta
usabile in transactiones international.  In un depression
ordinari, le difficultate es un insufficientia de moneta al
precios existente; le precios non pote adjustar se satis
rapidemente pro mantener le equilibrio quando confrontate per
disturbantias monetari.
     In ambe casos, alora, le difficultate es obstaculos al
transactiones, e le lapso de transactiones impedi le production.
In ambe casos iste obstaculos consiste in precios e quantitates
de moneta que non es al nivellos que equilibrarea le mercatos.
Precios incorrecte e insufficientia de moneta disrumpe le
coordination economic.
     Iste analogia inter le duo casos appoia, io pensa, le
theoria monetarista de fluctuationes conjunctural.

                Salutes,
                Leland Yeager