Tote le versiones in le sito presenta iste preambulo. Io lo traduceva e
ora io lo submitte a vostre appreciation.

ALTE COMMISSARIO DEL NATIONES UNITE PRO LE DERECTOS HUMAN
Cinquantesime Anniversario del Declaration del Derectos Human
Tote le Derectos Human pro Totes!

DECLARATION UNIVERSAL DEL DERECTOS HUMAN
Adoptate e proclamate per le Assemblea General in su resolution 217 A
(III) del 10 de decembre de 1948

Preambulo

Considerante que le recognoscentia del dignitate inherente a tote le
membros del familia human e de lor derectos equal e inalienabile
constitue le fundamento del libertate, del justitia e del pace in le
mundo;

Considerante que le ignorantia e le disprecio del derectos human ha
conducite a actos de barbaritate que ultragia le conscientia del
Humanitate, e que le advenimento de un mundo in le qual le esseres human
frue del libertate de parlar e de creder, liberate del terror e del
miseria, ha essite proclamate como le plus alte aspiration del homine;

Considerante que il es essential que le derectos human sia protegite per
medio de un regime de derecto, a fin que le homine non sia compellite,
in supreme recurso, al rebellion contra le tyrannia e le oppression;

Considerante que il es essential promover le disveloppamento de
relationes amicabile inter le nationes;

Considerante que, in le Charta, le populos del Nationes Unite ha
reaffirmate lor fide in le derectos human fundamental, in le dignitate e
in le valor del persona human, in le equalitate del derectos del homines
e del feminas, e se ha declarate resolute a favorir le progresso social
e a instaurar melior conditiones de vita in un major libertate;

Considerante que le Statos Membros se ha compromittite a promover, in
cooperation con le Organization del Nationes Unite, le respecto
universal e effective del derectos human e del libertates fundamental;

Considerante que un conception commun de iste derectos e libertates es
del maxime importantia pro le plen complimento de tal compromisso;

Le Assemblea General

Proclama le presente Declaration Universal del Derectos Human como ideal
commun a attinger per tote le populos e nationes, a fin que tote le
individuos e tote le organos del societate, habente lo constantemente in
mente, se effortia, per le inseniamento e per le education, a
disveloppar le respecto de iste derectos e libertates e a promover, per
mesuras progressive de charactere national e international, lor
recognoscentia e lor application universal e effective assi inter le
populationes del mesme Statos Membros como inter illos del territorios
sub lor jurisdiction.

Articulo 1

...

Ensjo.

______________________________________________________
Get Your Private, Free Email at http://www.hotmail.com