Io negligeva a dicer que heri io e mi sposa nos conduceva un curte
distantia de nostre casa a Montania Kennesaw ubi il ha un Parco pro
un campo de battalia famose del guerra civil.  Nos entrava le centro
pro visitores, ubi io examinava plure libros super le historia del
guerra civil e io finalmente comprava uno super le battalias de 1864
inter Sherman e Johnston quando Sherman duceva su armea de Chattanooga
verso Atlanta e postea a Savannah.  Le Montania Kennesaw es circa
200 metros in altitude super le plano a basso.  Su superfacie es plen
de arbos e petras grande. Le facie al norde es multo precipitose, e
minus precipitose al sud verso le citate de Marietta.  Le rango de
montanias a que Montania Kennesaw es le plus grande se sede inter
le armea del nord e le citate de Marietta, e quando occupate per le
armea del sud, faceva passage per le ferrovia impossibile.  Al nord
le collinas es minus precipitose, quasi como unduas gentil in le terra.
Nonobstante illos esseva coperite con un silva dense.  Gen. Sherman
voleva vader circa le Montania Kennesaw, mais ille non voleva vader
multo distante del ferrovia que esseva su linea de material.  Proque
le collinos al sud del rango de que le Montania Kennesaw es le plus
grande es minus alte, Sherman sperava a fortiar un avantia circa le
montania al sud per capturar le parve collinas.  Ille equalmente
voleva essayar un avantia per le nord del Montania.  Mais pro
preoccupar le occupantes del defensas del Montania tal que illes non
poteva reinfortiar le fortias Confederate al nord e sud del
Montania Kennesaw, ille ordinava un attacco in le centro directemente
verso le Montania.  Su fortias essayava a ascender le precipitose
inclina. Mais illes esseva haltate per un fer defensa del occupantes
del culmine del montania qui esseva in trencheas al culmine.  Su
avantia al collinas al sud equalmente incontrava un grande fortia
in trencheas e le rangos del armea del nord esseva tondite como le
gazon per le fusiles de un longe linea de infanteria del armea del
Confederatia, qui esseva reinfortiate per cannones, e lor avantia alla
esseva equalmente stoppate.  Mais le action al nord del montania
habeva un certe successo.  E ben que tacticamente le Sud habeva
vincite le battalia, le successo al nord esseva bastante menaciante
que Johnston decideva nonobstante a quitar su position e mover su
armea al sud verso Atlanta.  Como tote guerras, isto esseva un
terribile guerra con alte mortalitate.

Quandocunque mi sposa conduce su automobile al specieria, illa passa
per un casa al fronte de que es un signo que dice que iste casa esseva
occupate per un general del armea del nord qui lo usava como su
quartiero general in operationes al nord del Montania Kennesaw.
Le strata de Bells Ferry via le qual illa conduce su automobile
existeva mesmo in 1864.  Illo es solmente un facile promenada de
mi casa a iste strata e mesmo le casa historic.  Mi proprie
casa esseva constructe solmente 25 annos retro. Nostre casa es al
nord de Montania Kennesaw.  Al retro de mi casa es un parve
rivo que ha su origine presso le base de Montania Kennesaw.

Stan Mulaik