Iste cosa del copiamento, copiatura(?) es interessante.
Io memora que jam como puero io legeva in le svedese
edition de Reader's Digest (que se appella Det Bästa,
i.e. Lo Optime) un articulo del fantastic maghetofono,
que lo rende possibile registrar musica per un
radiostation e postea ascoltar lo. Alque como "Un fermero
in le Occidente Medie (in le Statos Unite) ha registrate
omne le programmas de musica classic que se diffunde per
frequentias modulate e nunc ille ha un formidabile
"bandoteca" de musica classic que ille pote ascoltar post
le fin del labor".

E io ipse comprava un audioregistrator (magnetofono) del
marca Philips per le qual io poteva registrar 4 horas de
musica, satis bon. Del radio, particularmente del
stationes estranier, io poteva registrar musica que on
nunquam audiva per le Radio Svedia. Sur mi fonobandas io
habeva musica "fado" de Portugal, cantos folkloristic
russe e polonese, e musica popular del Statos Unite io
poteva registrar ante que le musica habeva attingite le
botecas de discos in Svedia. Pro non parlar del parola
parlate. Io registrava prelectiones in anglese, notitias
in polonese, francese e germano. Al minus io apprendeva
le pronunciation!

Viste que il es satis facile distribuer le musica via le
rete e facer le receptores pagar pro illo, io es satis
stupefacite que tante pauc artistas ha probite crear un
contacto directe inter le artista e su publico sin le
mediatores del Entreprisas de discos, le distributores e
le venditores in detalio.

Un altere cosa es le precios horripilante pro discos
compacte. In Svedia on paga c:a 20 euro pro un disco
compacte. Considerante que le precio pro fabricar un tal
disco non es multo grande on debe ganiar un massa de
moneta per iste practica.

Quanto al copiar, il es le mesme situation como in le
Statos Unite ci in Svedia. Io pote copiar un integre
libro, si io lo vole pro mi uso personal. Assi io copiava
un integre serie de scripturas in e re le lingua
artificial "Occidental" ante alcun annos.

Kjell R