LE HOMINE EXCAMBIATE
("O homem trocado", de Luis Fernando Verissimo)


Le homine se evelia del anesthesia e reguarda in giro. Ille es ancora in 
le sala de recuperation. Il ha un infirmera a su latere. Ille demanda si 
toto ha occurrite ben.

-- Toto perfecte -- dice le infirmera, surridente.

-- Io timeva iste operation...

-- Perque? Il habeva necun risco.

-- Con me, il sempre ha un risco. Mi vita ha essite un serie de errores...

E ille conta que le errores ha comenciate in su nascentia. Ha occurrite un 
excambio de babies in le maternitate e ille ha essite educate usque al 
dece annos per un copula de orientales, qui non ha jammais comprendite le 
facto de haber un filio clar con oculos rotunde. Quando le error ha essite 
discoperite, ille ha ite viver con su ver parentes. O con su ver matre, 
perque su patre habeva abandonate le sposa post que illa non habeva sapite 
explicar le nascentia de un baby chinese.

-- E mi nomine? Altere error.

-- Vostre nomine non es Lírio?

-- Deberea esser Lauro. Illes ha errate in le bureau del notario e...

Le errores se succedeva. In le schola, ille sempre recipeva castigamento 
pro cosas que ille non faceva. Ille ha facite le examine de admission al 
universitate con successo, mais non ha essite admittite. Le computator ha 
errate, su nomine non ha apparite in le lista.

-- Desde annos retro mi factura del telephono veni con cifras incredibile. 
Le mense passate io ha debite pagar plus de 300.000 cruzeiros.

-- Vos face multe telephonatas interurban?

-- Io non ha telephono!

Ille ha cognoscite su sposa per error. Illa le ha confundite con un altere 
persona. Illes non ha essite felice.

-- Perque?

-- Illa me traiva.

Ille ha essite imprisionate per error. Varie vices. Ille recipeva 
intimationes pro pagar debitas que ille non faceva. Ille mesmo ha habite 
un breve, folle allegressa, quando ille ha audite le medico dicer:

-- Vos non ha plus sperantias.

Mais illo equalmente ha essite un error del medico. Non era assi tanto 
grave. Un simple appendicitis.

-- E si vos dice que le operation ha occurrite ben...

Le infirmera ha cessate surrider.

-- Appendicitis? -- illa ha demandate, hesitante.

-- Si. Le operation era pro retirar le appendice.

-- Non era pro cambiar de sexo?

~~~
Ensjo.

Interlingua-English Dictionary:
http://www.interlingua.com/ied/ied.php