Multe gratias pro tote le bon parolas in connexion con le lanceamento
heri del nove serie "Facile a leger in interlingua" con le prime tres
titulos (lege plus ci:
www.interlingua.com/official/2013-07-29-facilealeger e in le pagina
special del serie: www.interlingua.com/facilealeger).

Le vendita del libros debe, como sempre con le activitates del Union
Mundial pro Interlingua, assecurar moneta pro diffusion ulterior de
interlingua. Le serie pote sperabilemente crear appetito pro leger
ancora plus de libros in interlingua, assi que le lectores developpa lor
linguage e deveni sempre plus fluente e inspirate. Il es assi importante
que si multes como possibile supporta le activitates e assi,
sperabilemente, compra le nove libros - ante toto pro gauder de bon
lectura in interlingua, ma anque pro assecurar que sempre plus de
titulos pote apparer.

Nove titulos es ja in preparation pro le veniente menses.

Como mentionate in le presentation, le intention es anque poter livrar
plures del publicationes in le serie "Facile a leger in interlingua"
como e-libros. In tal caso, le precio pro cata titulo naturalmente
essera minor, proque il non ha costos pro impression e distribution.
Actualmente nos non pote dicer, quando versiones appare como e-libros.
Ma le UMI ja ha un (sempre plus) grande Bibliotheca electronic in
interlingua con materiales gratuite (www.interlingua.com/e-libros), de
novo pro inspirar e crear appetito a leger in interlingua.

Alora: Bon lectura - e gratias pro vostre supporto active.

Con mi optime salutes
Thomas Breinstrup
redactor de "Facile a leger in interlingua"


--
Pro leger le archivos e pro modificar o cancellar le subscription:
http://listserv.icors.org/archives/interlng.html