(Traducite ab Revista Veja, anno 30, nº 43, 29 de octobre de 1997.)

Sport
LEGION DE EXPERTOS
Con bon salarios e fama mundial, equipas de volley e basket attrahe athletas
estranier.
---
        Un legion estranier invadeva le campos brasilian in le ultime menses.
Inter le nove stellas del basket e del volley il ha atheltas american, russe,
croate, argentin, bulgare e de varie altere nationalitates. Con le inscriptiones
ancora aperte pro le registro de jocatores, le Confederation Brasilian de Volley
ja contabiliza dece-octo atheltas estranier -- dece-duo feminas e sex homines.
In le basket il ha cinquanta expertos venite ab le exterior, inter le quales
novem feminas. Plus que le quantitate, lo que salta al oculo es le qualitate de
iste estranieros. Illes ha contribuite decisivemente pro poner le campionatos
national inter le meliores del mundo. Le volley, per exemplo, conta con le
argentino Marco Milinkovic, eligite le melior attaccante del Liga Mundial del
anno passate. Le basket habe Cynthia Lynne Cooper, le melior jocatrice del WNBA,
le liga professional feminin del Statos Unite. "Nostre campionatos pote esser
comparate a los de Espania, Grecia e Yugoslavia, que es los de major indice
technic in Europa", affirma Hélio Rubens Garcia, trainator del Selection
Brasilian de Basket. "In le feminino, Brasil habe hodie le melior jocatrices e
le melior salarios del volley mundial", dice Ary Garcia, presidente del
Confederation Brasilian de Volley.

        Le invasion occurre per duo motivos principal. Le prime, e le plus
importante, es que le volley e le basket deveniva un negotio millionarie in
Brasil. Collectores de medalias olympic, iste duo sports attrahe patronos tanto
potente que illes veni a absorber le identitate del clubs ipse. Actualmente
quasi tote equipas de basket habe nomine de interprisas o productos. Es ille
patronos qui garanti le budget pro contractar jocatores in le exterior. Hodie,
un jocatrice de prime linea, national o importate, gania in Brasil usque 300.000
reales per anno [ 1 real (R$ 1,00) es approximatemente 1 dollar ]. "Le salario
es le melior argumento pro convincer un athleta a venir a Brasil", salienta João
Alberto Zappoli, "Joca", supervisor del Olympikus, equipa de volley de
Indaiatuba, in le interior de São Paulo, que, per determination del patrono,
veni de esser transplantate al Rio de Janeiro. Como jocator, Joca actuava in
Ancona, in Italia, inter 1988 e 1993. Ab ille epocha ille retine bon memorias e
un debito non pagate de 50.000 dollares per le italianos.

        VITRINA MUNDIAL -- Le secunde motivo pro le venita del estranieros es le
renomine del pais in iste duo sports. Brasil deveniva un vitrina pro athletas de
tote le mundo. Le selectiones feminin de Brasil es medalias de bronzo in le
volley e de argento in le basket del Olympiades de Atlanta. Le masculin de
volley era auro in Barcelona. Jocar in un equipa brasilian hodie es facer
companion a alicun del melior jocatores del mundo. "Es un honor jocar al latere
de athletas como Ana Moser", declara le svedese Angelica Ljungquist, de 22
annos, contractate per le Dayvit, de São Paulo.

        Usque le anno passate, Angelica participava del campionato universitarie
del Statos Unite, a ubi illa habeva cambiate domicilio con le objectivo de
studiar. Quando illa recipeva le proposition de jocar in Brasil, illa acceptava
immediatemente. Con illa veniva le americana Tammy Liley, 32 annos, ex-capitana
del selection del Statos Unite e ex-jocatrice de volley de plagia. Campiones in
São Paulo iste anno, le duo va disputar ora le Superliga national, que initia
iste novembre. Inter lor adversarias es le hollandeses Cinthia Boersma e Erna
Brinkman, del equipa Rexona, de Curitiba. Erna, 1,84 metro de altor, ja jocava
in Japon. "Io decideva venir a Brasil pro cercar nove experientias", illa
affirma. "In Japon io non habeva vita social e le jocatrices era multo basse."
Capitana del selection hollandese, campion europee in 1995, Cinthia dice que
illa veniva pro moneta: "Post le Olympiades, Brasil paga multo melior que
Italia."

        HABITO ANTIQUE -- In le basket feminin, le arrivata de athletas
estranier es un novitate que comenciava pauco post le conquesta del campionato
mundial in 1994 e del medalia de argento in Atlanta le anno passate. Un del
ultime reinfortios, Cynthia Cooper, eminentia del prime campionato del WNBA,
cambiava domicilio un mense retro ab Houston al citate de Americana, in le
interior de São Paulo, insimul con altere cinque jocatrices del Statos Unite. In
le basket masculin, le habito de importar jocatores es plus antique. Un ration
es que, in iste modalitate, sempre abundava mano de obra qualificate in le
mercato american. Le paulistas [gente de São Paulo], responsabile per le
importation de medietate del estranieros del basket, desde annos retro sole
reinfortiar lor equipas con atheltas ab foras. Iste anno le cariocas [gente del
Rio de Janeiro] adhereva al moda. Illes apportava dece reinfortios american e
rendeva le debile campionato carioc un grande successo.
---
Con reportage de Arthur Rosa, de Curitiba.
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html