Car amicos!
Un secunde vice in mi vita io contraheva le dengue, un maladia infectiose
transmittite per le mosquito Aedes Aegypti.
Illo comenciava le mercuridi passate, die 28. Io veniva al labor e
comenciava sentir febre e dolor in le corpore.
Post prandiar in casa io esseva incapace de retornar al labor. Le febre
attingeva le 39°C e mi corpore exigeva que io me jectava al lecto o al
hamaca. Io comenciava a medicar me con Paracetamol e finalmente de nocte io
succedeva a levar me.
Con le medication io me sentiva melio le matino sequente (die 29 de
januario, mi 31e anniversario!), e io iva al labor. Le medico laboral
demandava un examine de sanguine, mais proque io me sentiva ben io remaneva
al labor. De nove, totevia, le febre augmentava e io non poteva retornar le
postmeridie. De nocte io iva a un laboratorio pro colliger sanguine pro le
examine.
Le scenario se repeteva le venerdi, die 30: io me sentiva melio, tentava
retornar al labor mais le febre augmentava e io restava in casa le
postmeridie.
Le sabbato io remaneva in casa, in reposo absolute.
Le dominica mi matre faceva un "feijoada" pro commemorar mi anniversario,
como nos habeva programmate antea. Io, Rosana e Luísa iva a su casa e
recipeva le visita de alcun cosinos mie. Non esseva un festa con multe
"agitation", naturalmente. :-) Io remaneva plus tosto sedite, e jocava War
(un variante brasilian del joco de guerra "Risk" o "Risiko") con un cosino
e mi nepote. (Mi objectivo esseva accumular 50 unitates de armea in le
Oriente Medie; io esseva exterminate per mi cosino ante le fin, mais nostre
lucta permitteva a mi nepote vincer le joco.) Le febre non retornava
durante tote le die, e non esseva necessari ingerer Paracetamol. Mi corpore
comenciava a prurir e presentar maculas rubie, altere symptomas de dengue.
Hodie io veniva al labor, ben que mi ferias comencia hodie. Io monstrava al
medico le resultato del examine de sanguine e ille me monstrava le indicios
de dengue: basse quantitate de leucocytos e de.... [PT/ES plaquetas, FR
plaquettes, IT piastrine, EN platelets, DE Blutplättchen]. Le maculas rubie
es microhemorrhagias subcutanee. Le sanguine premente le sensores del pelle
produce le prurito. (Que belle, nonne?) Io ora arrangia alcun cosas
pendente pro mi substituto durante le vacationes (cosa que io non succedeva
facer le septimana passate).
Usque a 23/02/2004, dirige communicationes private a mi altere adresse,
[log in to unmask]
A revider,
Ensjo.
|
