Car lectores!

Le nove version beta de Skype (3.0.) offere le possibilitate de crear e
participar cameras public de chat vocal. Isto es: totos pote connecter se a
iste canales (nominate "skypecasts") e ascoltar vostre conversationes. Si le
ascoltatores demanda le hospite del camera, illes pote reciper le stato de
"parlator" tamben.

Secundo le idea de Jan Armann (Svedia) nos ha create le skypecast
"Interlingua - lingua international". Secundo ille isto es un grande
possibilitate de attraher nove interessatos pro interlingua, nam quicunque
pote connecter se liberemente al camera e ascoltar le interlingua parlate.
Io spera, ille va haber ration.

Duo vices nos ja ha essayate iste possibilitate pro vider, como illo
functiona. Pro saper, qual die es le optime, nos ha decidite probar le dies
del septimana pro le incontros futur ante de fixar un die pro le chat audio
in interlingua. Le sequente die de proba es deman, dunque martedi; consulta
iste adresse: 

https://skypecasts.skype.com/skypecasts/skypecast/detailed.html?id_talk=458751 

pro plus de informationes. Le commenciamento del chat es planate pro 20
horas (pro isto io determinava 21h, proque isto significa 20h in tempore
centro-europee - CET). In ille tempore un ligamine "extra" va apparer sur le
pagina, que non se trovava ibi anteriormente e illo va diriger uno
directemente al skypecast de interlingua.

Io vos incoragia, que vos participa iste camera aperte si multe como
possibile! Non importa, si tu non ancora parla interlingua, tu pote solmente
ascoltar lo tamben. Si tu ja sape interlingua, isto es un multo bon
opportunitate de practicar lo parlate! Ma attention: a connecter se a un
skypecast il es besoniate le systema operative Windows XP de tu computator.
Regrettabilemente usatores de computatores mac non (ancora?) pote connecter
se a skypecasts.

A reaudir deman, martedi post 20h CET (19h UTC) in le skypecast (chat vocal
public) de interlingua!

Péter Kovács
Hungaria

--
Archivos e disabonar: http://listserv.icors.org/archives/INTERLNG.html