Iste septimana, a jovedi, io e mi sposa ha volate de Atlanta a
Salt Lake City in Utah, pro assister in un reunion de mi classe
de 1953 in le schola secundari.  Isto esseva le anniversario
cinquantesime de mi classe. Le vespere de venerdi io e mi sposa
assisteva a un soirée al casa de un del alumnas a que circa 300
personas ha assistite.  Io possibilemente sapeva solmente un dozena,
e isto esseva solmente un parve parte del classe, que habeva circa
1000 studentes in 1953. Le major problema esseva que alcun personas
io non ha vidite desde 1953.  E necuno habeva un facie exactemente
como su facie in 1953.  De facto le cambios de apparentia esseva
frappante pro le majoritate de nos.  Alcunos con capillos in 1953
in 2003 habeva devenite calve.  Alteres sin oculares in 1953 habeva
oculares in 2003.  Alcunos habeva acquirite barbas.  Alteres haveba
crescite lor peso, in altere parolas ha devenite corpulente.  Le
feminas habeva nove stilos de capillatura; multe homines mancava de
capillatura.

Le casa a que occurreva le soirée esseva bellissime mais non troppo
grande, situate in un 'communitate con muros e porta'.  Le hostessa
non jammais ha maritate se, mais illa obviemente habeva moneta, proque
le muros de su casa esseva decorate con picturas de arte moderne--mais
placente e non choccante.  Le tabulos e plancas esseva plen de varie
arte e sculpturas de vitro, multo belle.

Le vespere de sabatto il habeva le grande reunion in le nove e le
plus magnific hotel "Le Grande America" in le centro del citate.  E
nostre reunion esseva in un grande salon.  Io dicerea que circa 800
personas esseva la, includente le ex-studentes e lor sposas.

Mais le committee cargate con le organization del reunion habeva
publicate un grande libro con duo photographos de cata persona qui
ha respondite al littera a membros del classe super le reunion.
Un photographo esseva in le annual de 1953 de nostre classe, e le
secunde esseva un photographo currente.  Associate con le photographos
esseva un paragrapha summarizante le vita del persona picturate.
Io usava le libro pro cercar pro personas qui io ha cognoscite in 1953.
Sin lor picturas currente, io non haberea essite capace de recognoscer
les.

In 1953 a nostre schola nos habeva un choro sub le direction de sra
Bowman.  In 2003 le membros de iste choro de novo se reuniva in fronte
de nos e sub le direction del pupilla de Sra. Bowman (qui esseva
morte) le choro esseva conducte in plure cantos.  E illos esseva
belle.  A ver dicer multe membros de iste choro esseva membros del
famose Choro del Tabernaculo de Mormones, e il esseva facile pro illes
a sequer le conduction de Sra Anderson, le pupilla de Sra Bowman, e
un membro de mi classe.  (Io ha cognoscite  la desde le schola
primari, e de facto esseva amorate de la in le grado secunde al
etate de 7.)

Il esseva interessante a vider mi vetere amantes de aquelle tempore.
Mais io habeva mi belle sposa con me, e illas con le lore.

Illo esseva un bellissime fin de septimana.

Notate in passar, quando al aerodromo, nos debe passar per un
inspection de securitate. Le cultellos, cisorios, le tornavites
e  qualcunque altere arma esseva interdicte.  E le machinas de
detection esseva multo sensitive.   Cata vice, a  Atlanta, e a
Salt Lake City, le machina de detection ha alarmate se.  E le ration
esseva mi calceos.  Io debe seder me in un special loco, remover
mi calceos, e sta pro un cerca manual con mi bracios extendite
horizontemente.  In le interim alcuno ha prendite mi calceos  e
ha inspectate los con un machina special--pro le explosivos.
In le fin a passar esseva permittite a me.

Mais un novitate esseva le kiosks de computator in le vicinitate
del banco pro billettas.  Si on ha comprate su billettas in le
web usante un carta de credito, on debe solmente presentar
su carta de credito, inserite in le kiosk pro obtener un passo
de imbarcation imprimite immediatemente, con informationes super
le numero de porta a que le avion va stationar se.  Cata anno
porta novitates in nostre vitas.

Stan Mulaik