Sanct Johannes o Medieestate. Mi inspiration a iste message es un
information per le radio que multe personas se collige circum le monumentos
paleolitic de Stonehenge pro celebrar le Solstitio estival, un historia
bastante pagan, secundo le reporto del radio.

Forsan io ha narrate de isto antea. Le medieestate occurre in Svedia sempre
le fin de septimana plus proxime al die del solstitio estival, le 21 o 22
de junio. Isto es le plus longe die del anno e como le plus longe nocte in
decembre etiam iste plus curte nocte del anno es plen de magica.

Per tradition le juvene feminas colligeva 7 o 9 varie species de flores que
illas poneva sub le cossino pro soniar del marito futur. On non debeva
parlar con altere personas durante iste processo. (Felice que io non era un
puera, proque io non poterea esser silente!)

Le vigilia del die del solstitio, le vigilia de Sanct Johannes (le
baptista) es le plus grande festa del anno. In le natal on es
frequentemente a casa con le familia, ma le Solstitio es le festa del amor
(carnal e romantic). Ma illo es etiam le festa pro tote le familia. In le
postmeridie il es le festa del familias con le infantes e adultes. On dansa
circum le palo se Sanct Johannes que vos pote imaginar como un cruce con
coronas de flores sur le bracios del cruce. Le folkloristas dice que isto
es un vetere symbolo phallic desde tempores pagan que ha essite sequestrate
per le ecclesia.

Ma que nos lassa le folkloristica e dansa le plus cognoscite dansa que
omnes svedeses dansa con grande entusiasmo. Il es un joco pro infantes, que
se appella: Le ranettas: On canta que le ranettas ni ha aures ni caudas e
dice quac quac quac. Le representantes del municipio de Stockholm
stupeficeva le Brusselianos dansante iste dansa national ante le edificio
le die proxime.

Si iste cosas de hymnos national e bandieras non era si seriose io dicerea
que le ranettas vermente es le dansa national del svedeses. Nos recommenda
le personas habitante in Espania e tal paises observar un gruppo de
touristas in un piscina apud un hotel ubi il ha svedeses...

Le locos touristic del Sanct Johannes le plus popular es situate in le
provincia de Dalecarlia (Dalarna in bon svedese, le nomine in Interlingua
veni del latino medieval). Ibi viagia multe gente, e un persona qui non
sapeva de que occurre poterea creder que il se tracta de un incontro de
football (o foot como io audiva in un transmission francese olim - multo
bon parola del resto...) a causa del alte frequentia de hooliganos: le
medios sempre rerporta de como le festa ha essite iste anno secundo le
policia!

:-) Como on pote selebrar su proprie Sanct Johannes. Isto necessita un poco
de preparation:

Si on in vostre pais usa arbores natal natural, on pote demandar su vicinos
de lor arbores. Del natal a medieestate ille arbores ha perdite omne le
aculos (le folias typic del coniferos). On crucia duo truncos e face
decorationes de coronas de flores assi que le tote contraption resembla le
littera russe pro f. Poste vos pote dansar circum iste palo :-)

Es mal tempore pro tal exercitios. Ma le meteorologos prognostica
positivemente - i.e. plus de calor!

Solstitiemente








Kjell [log in to unmask]
Kjell Rehnstroem
Vaenortsgatan 87
S-752 64  UPPSALA
Suedia - Sweden