Le prime guerra civil nasceva ex le machinationes de
Gaio Mario (Gaius Marius). Mario se faceva un
dictator militar e esseva un ex le consules roman
septe vices inter 107 e 86 ante Christo.
Ille anque introduceva le idea de un armea
professional. Iste cambio causava que le soldatos de
un armea esseva fidel non a Roma mesme ma a lor
general (duce), qui les pagava e les custodiava ben
pro retener lor fidelitate.
Le senatores roman videva Mario como un menacia a lor
dominantia politic. Illes appoiava Cornelio Sulla,
qui occideva centenares del soldatos de Mario e
reorganisava le governamento de maniera que le senato
poteva mantener un controlo plus firme sur le cosa
public (res publica, republica).
In le anno 63 ante Christo, un aristocrate ambitiose,
Catilina, qui essayava devenir un ex le consules roman
in tres electiones que ille perdeva, formava un
conspiration pro sasir le governamento de Roma.
Ille attraheva a su causa (1) aristocrates qui non
poteva o non voleva ganiar prestigio politic trans le
cursus honorum e (2) personas povre qui credeva que
illes non habeva ullo a perder. Finalmente, su
conspiration esseva supprimite per le consule Marco
Tullio Cicerone.
Un pauco postea, le general Gnaeo Pompeio retornava
victoriose ab ex le provincias de Asia. Ille
requestava que le senato approbava permanentemente le
systema de governamento que ille habeva establite in
Asia e que le senatores dava campos agricole a su
soldatos. Le senato refusava.
Pompeio tunc formava un alliantia private con Marco
Crasso, le homine le plus ric de Roma, e Julio Cesare,
un homine ambitiose qui non esseva popular con le
senato e cuje possibilitates de construer un carriera
politic trans le cursus honorum tunc esseva pauco
possibile. Le alliantia inter iste tres homines
deveniva le prime triumvirato, un parola latin que
significa "de tres homines".
Iste tres homines habeva assatis potentia politic pro
assecurar que Cesare deveniva un ex le consules in le
anno 59 ante Christo. Pompeio se maritava con Julia,
le filia de Cesare, pro fortificar le ligamines inter
le duo familias.
Quando le senato continuava su resistentia contra le
demandas de Pompeio, le triumvirato usava bandas
armate pro assecurar que lor opponentes non poteva
votar contra illes in le electiones senatorial.
Milone e Clodio esseva duo duces de iste bandas.
Secundo le practica general, le ex-consules e le
ex-praetores deveniva governatores del diverse
provincias roman. Cesare habeva assatis influentia
pro assecurar que ille devenirea le governator del
provincia de Gallia.
In iste epocha le romanos controlava solmente parte
del Alpes e le litore meridional de lo que nunc es
Francia. Illes non controlava le altere partes de
Francia, Helvetia (Switza), e Belgia, que tunc se
includeva in Gallia.
Durante su novem annos como governator, Cesare
conquireva omne Gallia e faceva incursiones a in
Britannia. Su prestigio como general e administrator
politic se augmentava grandemente a causa de iste
complimentos.
Ille anque deveniva ric post vender e su prisoneros
como sclavos e altere cosas de valor que ille habeva
robate durante su battalias. Ille usava iste moneta
pro pagar su debitos, que habeva augmentate durante su
consulato.
Le triumvirato continuava su functiones durante que
Cesare esseva in Gallia. In le ano 56 ante Christo,
le tres homines se reuniva e arrivava a un
concordantia pro continuar lor alliantia politic,
decidente que Pompeio e Crasso devenirea le consules
in le proxime election.
Crasso deveniva le governator de Syria in le anno 54,
ma tosto ille moriva in un battalia contra le parthos.
Pompeio remaneva in Roma pro luctar contra le
partisanos de Milone e Clodio.
Finalmente, le senato dava a ille le authoritate
extraordinari pro supprimer iste rebelliones. Ille
habeva successo in iste effortio.
Le guardacorpores de Milone habeva occidite Clodio in
januario in le anno 52 ante Christo, e Milone esseva
processate legalmente pro iste crimine. Post su
conviction, ille esseva inviate a in exilio.
Cesare nunc esseva al puncto de terminar su carriera
in Gallia. Ille eventualmente deveniva le sol
imperator in Roma e esseva occidite. Tunc su nepote,
Gaio Octavio, e Marco Antonio se luctava inter se pro
controlar Roma.
Octavio ganiava, se nominava Augusto, e deveniva le
prime del imperatores claudian de Roma (desde 20 ante
Christo usque 14 anno domini). Post ille veniva
Tiberio (14-37 A.D.), tunc Caligula (37-41 A.D.), tunc
Claudio (41-54 A.D.), e tunc Nerone (54-68 A.D.)
Iste e subsequente periodos del historia roman
produceva multe textos in latino que ha essite
preservate usque nunc. Gradualmente io va presentar
unes ex illos in latino e interlingua in iste foro pro
demonstrar que le interlingua de Gode es tan valide,
viabile, e belle como le latino de iste periodos
historic, le qual ha un importantia fundamental in le
historia de Europa e del Americas.
__________________________________________________
Do you Yahoo!?
Yahoo! Tax Center - forms, calculators, tips, more
http://taxes.yahoo.com/
|
