Anque io es un poco invidiose de tu sojorno in Nice, Paul. Si tu ancora 
es la, io ha alcun recommendationes, proque nos esseva in Nice in le fin 
de april, quando le temperatura probabilemente non esseva si alte como ora.

Certo, vos debe visitar le mercato in Cours Saleya. Tote le botecas es 
la del matino usque a mediedie, e il ha tante bon cosas deliciose a 
comprar: salsicias, fructos, cosas sucrate etc. (vide mi photos in le 
material de inseniamento "Un visita al mercato in Nice": 
http://www.interlingua.com/archivos/pdf/Un%20visita%20al%20mercato%20in%20Nice.pdf). 
Lo que es curiose, es que a mediedie le botecas dispare poco a poco, e 
alora le restaurantes vicin in vice plena tote le corte.

In Nice tote le billetes pro le autobus costa un euro - independente del 
distantia. Nos prendeva le autobus local (numero 400) le 55 minutas al 
charmante citate medieval St-Paul-de-Vence. Sempre solmente un euro! 
Certo le transporto public in altere paises, inclusive ci in Danmark, 
pote apprender multo de iste tarifas que vermente attrahe le gente al 
transporto public. St-Paul-de-Vence es circumferite per un ancian muro 
de citate. Vermente recommendabile.

Prende anque le elevator del Promenade des Anglais a La Colline du 
Château (le Collina del Castello - mesmo si il ha nulle castello!). Le 
panorama es phantastic.

E visita alora Nicolas Alziari (14, rue Saint-François de Paule), un 
charmante boteca, ubi on pote comprar oleos de olivas, tapenade e tote 
le cosas que face le mente fugir al sud de Francia.

In un del veniente editiones de Panorama (www.interlingua.com/panorama) 
il habera un articulo, ben illustrate, super Nice. Io non revela qui es 
le autor...

Con mi optime salutes
Thomas Breinstrup


--
Pro leger le archivos e pro modificar o cancellar le subscription:
http://listserv.icors.org/archives/interlng.html