Arturo leve le sempre interessante question, quante
interlinguanos esque il ha?

De facto, necuno sape quante parlatores/usatores de interlingua
il ha in le mundo. Como obtener tal figuras? Il non necessa comprar
libros o devenir membro de un organisation pro apprender interlingua.
Io unquam excambiava posta-e. con un japonese qui ha apprendite (o
melio, ha construite) un version de interlingua sur le base de un
sol pagina exemplatori, plus su cognescentias de anglese e francese.
Ille faceva errores, certo, ma su linguage era vermente multo
imponente.

Sin dubita on poterea demandar statisticas como le
numero de membros del UMI, le numero de libros vendite, etc.
Pro su parte, le UMI pare evitar immiscer se in un "joco de
numeros". Isto es sage, secundo mi opinion, in vista del problemas
que le esperantistas ha generate per disseminar figuras dubitose.

Forsan minus sagemente, io ante alcun menses tentava colliger datos
comparative inter esperanto e interlingua. Si considera varie
indicatores (numero de publications, granditate de incontros,
numero de sitos in le web, etc.) on constata que esperanto ha un
avantage numeric super interlingua de inter circa 30:1 a 50:1.

Esque isto indica que le population de interlinguoparlantes es un
trentesime o un cinquesime del population esperantophone?
Probabilemente non; on non pote expectar un correspondentia linear.
Per exemplo, le population francophone de Quebec es circa 10 per
cento tanto grande que illo de Francia. Ma le numero de periodicos
franco-quebechese es probabilemente plus que 10 per cento del
numero francian, viste que le franco-quebecheses debe haber al
minus *un* magazine de novas, al minus *un* directorio televisori,
etc., durante que  le franceses metropolitan non besonia *dece*
magazines de novas, *dece* directorios televisori, etc.

Le mesme dynamica vale pro interlingua e esperanto. Alora, vamos
facer un estimato libere de 100:1 al avantage esperantista. Si nos
accepta le famose estimato de prof. Culbert - 2 million parlatores
de esperanto - nos habera le belle figura de 20.000 interlinguanos.
Si nos accepta un figura plus modeste - le 100.000 parlatores
fluente de prof. Lindstedt, per exemplo - nos ha un figura plus
parve. Totevia, le avantage actual de interlingua non jace in le
numero de parlatores de interlingua qua interlingua, ma in le
numero de non-initiatos que on pote attinger per medio de
interlingua: multe milliones de gentes.

Viste que nos ha plure statisticos experte inter nos, io debe
adder que tote mi figuras es speculativissississime.

Amicalmente,

Chris Burd
Victoria, Britanno-Columbia

P.S., Quante non-canadianos sape que nos celebra le 24e maio, le
anniversario del regina Victoria, como festa national? Belle, nonne?