Car Interlinguistas:

     In messages a iste gruppo Anne Burgi ha reprimendate le
redactores del sito interlingua.com in le WWW pro haber includite
un articulo per Frank Esterhill super le hypothese Sapir-Whorf,
un articulo que habeva parite antea in _Panorama_.  Le problema,
secundo illa, es que le hypothese S-W es racista, sexista, e
irrationalista.  In uno de su messages illa appella le sr.
Benjamin Lee Whorf tres vices un "schtroumpf".  Ultra isto, illa
non applica su accusation de racismo a un persona o organisation
specific, ma illa lo lancea in le atmosphera e lo lassa flottar
circa nostre discussiones.
     Io vide duo possibile explicationes: o (1) illa non
considera le accusation de racismo un accusation grave ma plus
tosto un specie de burla o (2) illa lo considera acceptabile
facer accusationes grave sin justification.
     Primo io non voleva exprimer mi objection publicamente, e io
ha inviate un e-posta private a Anne Burgi.  Io explicava que io
habeva legite le articulo de Esterhill duo vices e non trovava
ulle tracia de racismo, sexismo, o irrationalitate.  Esterhill
describe brevemente le hypothese Sapir-Whorf, mentiona que illo
es un thema controverse, e non exprime acceptation de illo.  Io
ha explicate a illa que io lo considerava irresponsabile e
contraproducente sublevar, nonobstante, tal accusationes de
racismo, etc., in nostre contexto.
     Le responsa de illa esseva lontan de satisfactori.  Illa
appella a su grado (anglese: pulls rank): ni le redactores del
sito interlingua.com ni io es linguistas, ma illa lo es.  (Antea
io non sapeva que le detalios de mi vita e carriera personal e de
illos del redactores esseva tan extensemente diffundite.)  Illa
lo considera paradoxe que un persona non professional--io--
critica su aviso professional a proposito del allegate racismo.
     Io ha legite materias super le hypothese Sapir-Whorf le
prime vice probabilemente in 1946 (pauco post le guerra), e desde
alora io ha essite intrigate ma non convincite.  Mi opinion
tentative actual, post le lecturas ulterior mentionate infra, es
que un version blande o debile del hypothese es correcte ma
trivial e que un version dur o forte es fascinante ma incorrecte.
     Totevia, le validitate o non del hypothese non es nostre
problema actual.  Io vole esser emphatic: le hypothese mesme non
es mi thema actual.  Nostre problema es frivolitate con
accusationes grave e le attitude que tal accusationes e calumnias
contra personas debe applicar se a questiones scientific.
     In le ultime dies io ha cercate attentemente in omne partes
de B. L. Whorf, _Language, Thought, and Reality_ (1956), Edward
Sapir, _Selected Writings_ (1963), e Harry Hoijer, redactor,
_Language in Culture_ (1954, que contine articulos e discussiones
presentate a un conferentia professional super le hypothese S-W).
Ultra cercar diligentemente, io ha legite le sectiones plus
relevante de iste libros parola per parola; e io non ha trovate
ulle indication de racismo.
     Alicun passages suggere que, al contrario, iste autores non
es racistas, ben que ille question non es le thema de lor
scriptos.  Whorf mesmo scribe--e io cita le anglese original pro
evitar le suspicion de un traduction distorquite--: <<[T]he
scientific understanding of very diverse languages ... causes us
to transcend the boundaries of local cultures, nationalities,
physical peculiarities dubbed "race," and to find that in their
linguistic systems, though these systems differ widely, yet in
the order, harmony, and beauty of the systems, and in their
respective subtleties and penetrating analysis of reality, all
men are equal>> (p. 263).  Su redactor, David G. Mandelbaum,
scribe de Sapir: <<Sapir had a staunch belief in human rights
which led him to resent oppression and discrimination wherever
they occurred>> (p. x).
     Post haber previemente legite _The Language Instinct_
(1994), per Steven Pinker, uno del autoritates citate per Burgi,
io ha relegite le section relevante.  Pinker critica le hypothese
S-W severmente, si, ma non face ulle suggestion que le hypothese
o su autores es racista.  Le mesme es ver de Michael Devitt e Kim
Sterelny, _Language and Reality_ (1987), un libro fascinante que
tracia parallelos inter le hypothese S-W e certe filos popular ma
erronee del philosophia de scientia: lor problema _non_ es
racismo.
     Io non ha legite omne obras per Sapir e Whorf e omne altere
obras que discute lor hypothese.  Io non pote, dunque, excluder
tote possibilitate que alicubi in iste vastissime litteratura
Anne Burgi poterea trovar alique super le qual illa poterea de un
modo o un altere fortiar un interpretation racista.  O forsan
illa ha un intuition global a proposito del racismo.  O forsan
illa accepta e repete un tal intuition de uno de su autoritates
favorite.  Ma isto non es le maniera de conducer le scientia o
controversia scientific.  Ni lo es le recurso a calumnias
personal.
     Anne Burgi ha facite un disservicio a interlingua per
lancear in le atmosphera intellectual circa illo le suspicion de
racismo.  Certo, su accusation es vage e non es dirigite a un
scopo precise, ma illo flotta ora in le atmosphera.  Tal
frivolitate, como altere species de frivolitate, tende a jectar
discredito super interlingua.  (Qui sape?  Forsan non-
interlinguistas de tempore in tempore lege iste gruppo INTERLNG.)
Il es irresponsabile sasir o fabricar opportunitates pro
politisar sempre plus de aspectos del vita.
     Le accusation per Anne Burgi es injustificate,
contraproducente, e injuste.  Io appella a illa a retraher lo.
               Sincermente,
               Leland Yeager