Alicun associationes libere sequente le notitia de Jay super le requesta
del esperantista super le numero de personas al conferentia:

Recentemente a sci.lang io ha postate un notitia in que io argueva que
il non necessita un sol lingua auxiliar, que nos debe liberar nos de iste
idea. In altere parolas il pote exister multe linguas auxiliar, como es
le caso hodie. Le esperantistas commencia con le premissa que il debe
exister un sol lingua auxiliar--e isto deveni le base pro le senso de
competition inter le linguas auxiliar. Nos pote rejicer iste idea,
durante que nos advoca le interlingua como un solution a problemas
practic.  Assi, interlingua non debe esser concipite como un lingua
pro tote le mundo; mais illo es melior como un lingua commun de Europa
o del civilisation del occidente.

E le successo de interlingua es un problema del relationes public,
de disveloppar un via a poner lo in le mercato.  Concipe de interlingua
como un programma del computator que es vendite.  Le programma debe
esser annunciate a milles de personas pro trovar los qui se interessa
in illo. Isto require le campania de mercato, a trovar illes qui
se interessara in usar lo, e le imagination del venditor es importante
a discoperir avantages pro le programma pro describer los.  Como pote
nos advocar interlingua como un pacchetto de software?

Io anque ha iste imagine in mi mente de un pictura del Interlingua-
English Dictionary, le Grammatica de Gode e Blair, le "Interlingua Today"
de Gopsill, monstrate in un pagina del tela transterrestre--iste libros
es substantial, seriose, grande, e real.  Monstra isto al inseniantes
de linguas romance e latino per le tela.

Justo ideas....

Stan Mulaik