===========================================================
NUNTII LATINI
per Allan Kiviaho
===========================================================
Car latinistas furiose!
Ecce le plus nova edition de Nuntii Latini per YLE
(Yleisradio, le compania de radiodiffusion finlandese)
NUNTII LATINI
RUSSIA ET NATO CONCORDIAM INVENERUNT
Post difficiles consultationes, quae
multos menses duraverant, Jevgeni Primakov,
minister a rebus exteris Russiae, at
Javier Solana, secretarius generalis
NATOnis, de pacto, quo relationes inter
Russiam et NATOnem definirentur,
consenserunt.
Oportet autem praesidens Jeltsin et
regimina sedecim nationum NATOnis
sociarum textum tractatus confirment.
Summa eius haec fere est:
- NATO et Russia consilium commune
constituent, quod bis singulis annis
conveniet.
- NATOni non est necesse arma
nuclearia aut copias peregrinas apud
novas nationes socias collocare, sed
ius hoc faciendi sibi vindicat.
- NATO asseverat omnes nationes in
ipsarum institutionibus militaribus
reficiendis arbitrium habere.
Utraque pars promittit se bonis
relationibus mutuis operam esse
daturam. Russia renovationes
continuare pollicetur, NATO doctrinam
suam strategicam recratrabit.
Praesidens Finniae Martti Ahtisaari,
qui nunc ipsum Africam Australem
visitat, censet suspiciones inter
Russiam et NATOnem hoc pacto amoveri.
Russos ostendisse se ad Europam
pertinere velle.
PAX TZETZENICA
Etiam de rebus Tzetzenicis fausti
nuntii afferuntur. Aslan Mashadov,
praesidens Tzetzenorum, cum praesidente
Jeltsin die Martis Moscuae tractatui
politico subscripsit, quo armistitium
inter Russos et Tzetzenos factum in
firmam pacem mutaretur.
Mashadov confitetur indepentiam
Tzetzeniae nondum esse confirmatam,
quamvis Russi de postulationibus suis
imperialisticis in Tzetzenia destiterint.
MOTUS TERRAE IN IRANIA
In Irania orientali die Saturni fuit
motus terrae, quo plus mille quingenti
homines interierunt et circiter duo
milia octingenti sunt vulnerati. Damna
materialia quingentis milionibus
dollarorum aestimantur.
In regionem calamitate afflictam
auxilium ex multis nationibus missum
est, ut cibaria, tentoria, stragula
aliaque maxime necesaria.
RHEUMATISMUS VITAMINIS ARCETUR
Ex investigatores enim animaverterunt
illos, qui his morbis afficiebantur,
iam antequam in morbum incidissent,
solite minus horum vitaminorum in
sanguine habuisse.
DEEP BLUE HOMINEM VICIT
In urbe New York scaciludio inter
hominem et computatrum certatum est.
Optimum in mundo scacista Garri
Kasparov cum ordinatro nomine Deep
Blue congressus sex ludis confectis
inferior factus est.
Anno superiore Kasparov ex simili
certamine victor evasit. Clades, quam
nunc accepit, illi est acerbissima,
nam antea omnes adversarios scacis
superaverat.
CERTAMINA HOCCEIA MUNDANA
Ludi mundani hoccei glacialis die
Mercurii Helsinkii finem habuerunt. In
tribus certaminibus finalibus congressi
sunt greges Canadensium et Suecorum.
Postquam uterque grex semel victor e
campo discessit, Canadenses tertio
certamine Suecos punctis duo ad unum
vicerunt et ita primatum ludorum
caperunt.
Finni spe decepti quintum locum
obtinuerunt.
CLARA PACTA, BONI AMICI,
PACTA SUNT SERVANDA.
MELIOR EST CERTA PAX QUAM SPERATA
VICTORIA.
VAE VICTIS!
Nuntios Latinos postridie Idus Maias
collegit et redegit Tuomo Pekkanen.
-----------------------------
E ecce un plus vetule edition
-----------------------------
NUNTII LATINI
LATINE LOQUI
COPIAE IN ALBANUM MITTENTUR
Consilium Nationum Unitarum a
securitate decrevit, ut in Albaniam
copiae plurinationales mitterentur,
quae Italis ducibus tumultus ibi ortos
sedarent.
In magnis civitatibus huic actioni
interfuturis sunt praeter Italiam
Francogallia, Graecia, Hispania,
Portugallia, Romania et Turchia.
Etiam Sueci in Albaniam aliquot
custodes publicos missuri sunt, sed
Finnia illud inceptum tantum oeconomice
sustentare constituit.
ODIUM ARABUM IN
Ministri Arabes negotiorum exterorum
conventu in urbe Cairo habito
moderatores viginti duarum civiatum
Foederis Arabici monuerunt, ne iam
relationibus cum Israelianis provehendis
studerent.
Causa decreti est, quod Israeliani
Hierosolymis orientalibus in area
Palaestiniensium novas colonias
constituere coeperunt. Civitates
Americae Unitae nuntiaverunt se
consultum Arabum graviter ferre.
SERVITUS FEMINARUM HODIERNA
Mercatura feminarum internationalis
forma quaedam servitutis hodiernae
exstitit, ut apparet ex relatione
Nationum Unitarum recens divulgate.
Feminas quotannis decipi, arripi, in
lupanaria deduci, in matrimonium
venumdari et ad labores domesticos
tolerandos cogi.
Plurimarum civitatum non interesse eas
tueri, cum id tantum curent, ut feminae
illegaliter importatae quam celerrime
expellantur.
PIONEER 10 IN SPATIO DERELICTUM
Pioneer 10, percontatrum spatiale
abhinc viginti quinque annos in inane
infinitum emissum, ultimum signale ex
extrema nostri systematis solaris parte
ad terram transmisit.
Fert secum instrumenta scientifica et
tabulam auream ut salutationem generis
humani, in qua nudum par viri et
feminae describitur.
Americani actioni Pioneer 10 finem
faciendum esse decreverunt, cum sumptus
in eam impensi iam nimis magni essent.
OSSA HEROUM BELLI INQUIRUNTUR
Vestigationes militum Finnorum, qui in
patria defendenda occisi in finibus
hostium remanserunt, etiam aestate
futura continuabuntur.
Ad ossa heroum belli invenienda grex
voluntariorum regionem inter Careliam
Ladogae et Murmansk patentem
perscrutabitur.
Inquisitionibus his quattuor annis
factis corpora 500 fere Finnorum bello
caducorum in silvis Russiae iacentium
iam reperta sunt.
INSTITUTUM IBEROAMERICANUM
In urbe Matrito Institutum Finniae
Iberoamericanum inauguratum est
auspiciis ministrorum Finniae et
Hispaniae culturalium.
Inter hospites ad illam sollemnitatem
invitatos erant legati Portugalliae et
omnium civitatum Americae Latinae.
Nova sedes ad cultum civilem et
scientificum inter utramque partem
provehendum spectat et etiam rebus
oeconomicis prodesse studet.
Finni iam plus decem instituta
culturalia peregre habent.
VICIT VIM VIRTUS
MUNDUS VULT DECIPI
IN COMMUNE QUAERUNT
Nuntios Latinos collegit, redegit et
in grapheo Televisionis textualis
ordinatro scripsit Reijo Pitka"ranta.
Allan
|
