Io pensa que nostre discussion super le character de INTERLNG es
interessante e de valor.  Como semper le membros de iste gruppo comporta se
con manieras multo polite e amabile.  Heri io ha facite un comparation
inter INTERLNG e un soiree ubi personas va a veni e son libere a participar
o non.  Themas como religion e politica son semper periculose -- e in le
societate interpersonal de soirees e in foros como hic, le nostre.  Si io
non es erronee, nostre discussiones infrequente super ille themas ha habite
semper polite.  Con un sol exception ironic (per un membro nunc partite ex
le gruppo) io opina que le varie participantes ha exprimite lor proprie
positiones con intelligentia e politessa e non ha attaccate le fides de
alteres.  Mais, personalmente (e malgrado le facto que io ipse ha
participate in illos), io salutava le fin de ille discussiones con
relevamento.  Un relevamento forsan un pauco similar a lo que sentite per
soldatos post haber transversate un campo de minas.

Malgrado le facto que quasi omnes prefererea limitar le uso del lista in
accordo con iste o ille ration, io (como un del administratores de INTERLNG
-- Ensjo essente le altere) trovarea le execution de un function de censura
MULTO difficile e etiam periculose.  Como administrator de un lista servite
per le servitores del Universitate St. John's, io es requite participar in
un gruppo de correspondentia con altere administratores.  Io pote vos
dicer!  Il ha listas ubi le administratores tenta mantener controlo per
censura, mais io opina que le resultato es raremente bon.

Io suggere que cata un lege de nove le "scopo de INTERLNG" (includite in le
message recente de Jan Armann).  Que nos mantene le spirito de libertate,
amabilitate, e consideration mutual usque nunc si typic de nostre bon
gruppo.  Avante toto, que nos nos rememora que nos omnes son esseres human.
E que humanos son individuales imperfecte e debile.  Si alcunos qui vole
travaliar seriosemente sur themas troppo specific pro interesse general,
illes son libere a formar un nove foro dedicate a ille scopo.  Nos deberea
benvenir le formation de nove foros in interlingua.  Si interlingua ha
successo e continua a crescer, il es obvie que le parve gruppo de
correspondentia, INTERLNG, non serea capabile a absorber milles de nove
adherentes.  Nos debe sperar que le die veni quando il habera un foro
"SCI.LANG.INTERLINGUA" o alque similar.  E, con etiam plus tempore, MULTE
foros ubi le lingua standard e acceptate es interlingua.

-- frank