Inspirate del description de un interessante die que faceva Jay ego pote
narrar que ci in Uppsala, al minus olim, in tempores passate, il habeva multe
testes de Jehovah, qui distribueva lor scripturas - in traduction svedese,
naturalmente. Illes face anque assi que illes visita le appartamentos de
humanos e los invita al incontros e servicios. Multe personas vide isto como
un momento disturbante durante que alteres lo vide como un interruption
agradabile in le enoio diurne. 

In facto non distante de mi appartamento il ha un templo de mormones con un
parcatorio pro automobiles e le corbes necessari pro jocar basketball (o como
on dice in Svedia: "basket"). 

Nunc il ha de novo hiberno e le temperatura minimal iste nocte era minus 7
grados. Al die il essera certemente 0 grados. Toto secundo le scala de
Celsius, qui in facto era un habitante de Uppsala. 

In facto Uppsala es un urbe multo international con habitantes tales como Carl
von Linné (o forsan melio cognoscite per su nomine latinisate Carolus
Linnaeus, le rege del botanica e classificator de omne plantas e animales. 

Le Uppsala ancian es localisate 5 kilometros del centro del citate e es
dominate per tres tumolos del 6te seculo de Nostre Era (AD in altere parolas).
In annos passate le gentes tanto voleva skiar de ille tumulos que on debeva
interdicer isto, proque illo troppo erode le copertura de terra. Sempre quando
ego visita ille tumulos ego senti le presentia in le aere del ancian vikings.
Ubi illes habeva un grande templo pro Odinolatria il ha nunc un micre ecclesia
christian con partes del 12-e seculo. 

Post un serie de non troppo successose probas tornar le upplandeses verso le
fide correcte isto finalmente portava successo - per le supporto del rege - e
zelose missionario combureva le ancian templo e errigeva le parve eclesia del
qual ego jam ha parlate.

Upplandia, le provincia in le qual Uppsala es le urbe principal (lassa nos
oblidar le facto que un parte del capital Stockholm anque es situate in
Uppland ;-)), es multo ric in inscriptiones runic sur saxos le quales le
humanos poneva in memoria de personas morite. Illes per consequente non marca
tumbas ma plus es tabulas de memoria. In un petra (o saxo) runic se scribe tal
cosas como "Torstein erigeva iste saxo in memoria de su fratre Sveinn qui
dispariva in un expedition al ariente."

Approximante nos al urbe central nos vide le silhuette del Castello e le
Cathedral, le resultato de un prolongate processo de construction in le 14-e e
15-e seculos. On pote ben imaginar se le impression que iste edificio debe
haber facite al visitantes in le etate medie. 

Per Uppsala curre le fluvio Fyris, illo es non tanto large como le Tibere in
Roma ma il ha alcun caditas de aqua. In le vigilia de Valpurgis on organisa
concursos pro naves a fabrication del studentes. Le plus fantastic navicula es
naturalmente le optime, con proviso que illo pote attinger le scopo, le Fin.
Enorme massas de humanos visita le cursa torrential "como on lo appella". 

In facto le vigilia de Valpurgis es le festa del studentes al universitate e
etiam de altere studentes. Le vetere tradition es que al hora exacte 15.00 le
studentes universitari pone sur lor capites le bonettos blanc con un nigre
visiera e in nostre tempore bandas que indica le programma del gymnasio que le
studente ha passate. 

In le festa del vigilia de Valpurgis, le qual on pro brevitate appella
_Valpurgis_ toto e un poco plus es permittite. Le juventute ha un tendentia
reguardar troppo profundemente in le vitro de vino e sole esser
documentabilemente inebriate jam al antemeridie del 30 de april (le
aniversario del nascimento de nostre Rege, a proposito).

Ego ha describite ille festa de Valpurgis antea e va nunc transir al
description de Uppsala como urbe. Le parte occidental es illo del academia,
i.e. del universitate. Le linea divisori es le fluvio Fyris con su multe
pontes. Al latere occidental il ha le Cathedral, le residentia del
Archiepiscopo e le Castello, le symbolo del poter del rege, qui in annos
ancian sovente habeva su residentia ibi. 

Le parte oriental es le parte del burghesia con fabros e travaliatores
(laboreros). In le prime medietate del seculo passate Uppsala era un urbe
industrial, con al minus duo fabricas de velocipedes (bicyclos), un rosteria
de caffe, un fabrica de sapones e scarpas plus industria textile e confectura
(on produceva mantellos). In nostre dies Uppsala es plus universitari,
academic con alcun entreprisas de informatica (IT). 

Tote Upplandia es ancian fundo del Baltico que se formava post le retraher se
del glacie continental post le fin del etate glacial. Il ha un argila blau que
es multo belle. Io non sape si isto es le material del ceramicos e tegulas que
on olim produceva in Uppsala. 

Uppsala comenciava in le seculo antepassate de attraher humanos del regiones
rural circum le urbe. Postea immigrava personas de altere partes de Svedia e
in nostre dies il ha nove uppsaleses de omne possibile loco del terra. E in le
parte oriental de Uppsala, etiam al latere oriental del ferrovia al region
septentrional de Svedia il ha per consequente un moschea. 

Uppsala ha devenite un loco in le qual multe culturas e fides se mixa. E nunc
quando le lumine reveni e le sol se leva plus anteriormente que le die
passate, le urbe es specialmente agradabile. Un amica de Catalonia diceva del
prime dies del estate in Uppsala: "Io nunquam poteva imaginar que Uppsala pote
esser un tal fantastic urbe. Isto merita plenmente le enoiose hiberno."

Ego es convincite que illa habeva ration.