Abortos nunquam ha essite un problema pro le
classes affluente. Naturalmente il esseva un
scandalo si le puera era gravide per alcun viro,
sed illa generalmente era mittite a un pension in
le extraniero o in un altere parte del pais ubi
illa nasceva le infante que era adoptate o date a
un "angelofactrice" que occideva le infantes per
insufficiente notrimento (pro que illa habeva
essite insufficiente pagate).

In le grande urbes (nos parla de un grandessa
multo relative ci!) in le 19-e ceculo il ha un
pluralitate de casos recordate quando le juvene
matre, non-marite, habeva per accidente suffocate
le infante durante le somno.

Le manco de locos ubi viver era grande in un urbe
como Stockholm, e pro maritar se on debeva haber
considerabile summas de moneta. Isto es typic
verso le fin del 19-e et le comenciamento del 20-e
seculo. Pro isto il habeva un multitude de
relationes de cohabitation (appellate "maritages
Stockholmense"...

In le residuos del grande reforma agrari que
dissipava le fermeros del village centralisate
circum le ecclesia, il habeva forte influentias de
movimentos dissentrista (sovente veniente del
Statos Unite, a ubi multe personas habeva
emigrate). Isto significava que le ecclesia
svedese perdeva su poter et le humanos comenciava
viver un vita si non foras de illo, tamen con un
multo tepide interesse in lo que occurreva in le
ecclesia.

Un juvena, serviente in un ferma o in un familia
burgese, sovente perdeva su labor si illa deveniva
gravide (mesmo si fer patre era le patrono del
familia). In le litteratura nos lege como le
grande poetas concubava le servas con grande
ardor. Illas era postea scandalisate, illes esseva
laudate como personas muuuuulto viril.

Verso le medio del seculo 20-e le autoritates
medical, que decideva del abortos, era multo
restrictive, in le casos que il non se tractava de
elementos minus desirabile*.

In le 60's Polonia, in iste tempore un democratia
popular, deveniva le grande pais de meregrinage
pro omne le feminas qui voleva haber un aborto de
un non-desirate graviditate. Le jornales era plen
de reportos de como on poteva viagiar a Polonia
pro facer le aborto.

In nostre tempore quando Polonia es un democratic
republica on ha, si ego non es errormente
informate, adoptate leges multo plus restrictive
quanto le abortos.

Post le "Viages de aborto" a Polonia le leges - o
al minus le practica - era cambiate in Svedia, et
il era multo plus "facile" haber un aborto in
Svedia. Le autoritates medical ha copulate isto
con un augmentite information in re medios de
anticonseption. Como in le resto del mundo on
parla appertemente del medios del anticonseption.
Tanto plus importante isto ha devenite coram le
apparition del acquirite immuno-deficientiose
syndrome (AIDS) (ma isto es un altere historia).

Gruppos a affiliationes religiose ha de tempore in
tempore tentate cambiar le opinion del population
verso un plus restrictive legislation in re
abortos. Le campanias flamma un momento et es
postea extinguite. Le campanias Pro vita
(vernacularmente appellate _ProLife_) sembla haber
essite inspirate del Statos Unite o altere paises
a lingua anglese.

Secundo lo que ego ha audite, le majoritate de
feminas es multo caute in le decision de un
aborto, i.e. illas non face le decision a facile
anima como le cambiar de scarpas.

Il es obvie que il es le femina qui ha le
decision. Si altere personas o gruppos vole
transprender le decision - generalmente in un
allegate cura del vita human - il es naturalmente
desirabile que illos etiam vermente se preoccupa
del benesser del infante que sera nascite.