On Sat, 22 Dec 2001 19:35:26 +0100, Daniel Wang
<[log in to unmask]> wrote:

>Mi nomine es Daniel, io es un studente juvene de
>Interlingua (16 annos), e io es un Norvegiano. Io ama
>linguas, e dunque io stude multe linguas, ora io stude
>principalmente linguas artificial, latino classic, e
>altere linguas classic. Mi vocabulario non es multo
>grande, sed io spera que io potera participar in
>discussiones hic.

Salutationes e benvenite. Le qualitate de tu interlingua es
impressionante; complimentos.

Quanto al vocabulario: interlingua es composite de parolas
international, e tu cognoscentias del norvegiano (le qual include un
grande parte del vocabulario greco-latin international) e del latino e
greco deberea render facile apprender vocabulario. Pro le nivello
conversational totevia non se require multissime vocabulos.

Io prefere appellar interlingua un lingua derivate, plus tosto que
artificial; reconstructe, plus tosto que constructe. Nulle parte de
interlingua es inventate ex nihil. Tote le vocabulos, excepte un parve
numero de conceptos grammatic pro le qual non existe formas
international, es prototypos moderne de origine greco-latin,
systematicamente derivate del formas supervivente in le linguas
europee. Isto es le grande differentia inter interlingua e linguas como
esperanto e ido.

Io habita in Groningen, Hollanda; io ha 27 annos. Io discoperiva
interlingua in februario o martio 2000, in le planca de libros de mi
amante, qui vive in Göteborg, Svedia; illa habeva in le annos 1980
recipite lectiones de interlingua de Ingvar Stenström, in le
"gymnasieskola" in Varberg, como parte del curso "allmän
språkkunskap" (cognoscentia general de linguas). Le libro scholar
capeva mi interesse, e le resto es historia, como on dice.

Io anticipa con interesse tu participation futur.

- Martijn