Tempore alicun retro in un grupo de novas sur le rete discutite era le
parolas eschimoano pro nive que on dice esser tante.  Io respondeva
que ego non crede lo esser solmente un phenomeno eschimoano.  Io
existimava que plure linguas ha un bon numero de parolas pro un cosa
particular (como nive) e io creava un lista de parolas norvegian pro
nive in formas varie.  Le lista cresceva celeremente (ma nos gentes
septentrional es solite viver con le nive - heri (29. april) un urbe
litoral in Norvegia (le plus grande in Norvegia septentrional)
obteneva un record nove: 240 centimetros de nive (o le nive nove omne
die postea octobre addite: 9 metros) - ibi nondum alicun primavera).

Le lista (con explicationes in interlingua):

mjøll: nive leve e sic
skare: jacimento dur de nive
slaps: mixtura de nive e aqua (sur le solo)
fonn: nive cumulate
drive: nive cumulate (de ventos)
sludd: nive miscite con pluvia
slatter: nive miscite con pluvia
hagl: grandine
bre: glaciero
rim: gelo, pruina
is: glacie
fokk: nive sufflante
føyk: nive sufflante
rokk: nive o aqua sufflante
drev: nive o aqua sufflante
gauv: nive sufflante
skavl: nive cumulate con un cresta acute
klake: glacie tenue sur un laco o glacie lubric sur le solo
jøkul: stalactite (grande) de glacie
ising: nive molliate regelate o pluvia gelate sur le solo
jake: blocco de glacie flottante o glacie tenue sur un laco o le mar
frostrøyk: nebula glacial
hjårn: jacimentos de nive gelate in glacie
brøytekant: nive cumulate preter le vias
hålke: glacie multo lubric (sur le vias)
heisk: nive leve e dispersate
bløyte: nive multo molliate
gadd: glacie o nive calcate inequal
dap: nive miscite con pluvia
iming: flocco minuscule de nive
sørpe: nive miscite con aqua sur le terra
jøkle: stalactite de glacie
slette: nive miscite con pluvia
råk: foramine in le glacie marin
kave: dense nive cadente 
krav: glacie multo tenue sur un laco o fluvio (que rumpe si toccate)

Si io addera le parolas composite, le lista serea de centos (o milles)
de parolas con significationes differente.



Glacialmente,

-- 
Steinar