Car amicos,

Gratias a Martijn Dekker pro le appello (le 25 de martio) a registrar
plus de audio in interlingua. Isto es un grande desiro, nam audio es
multo importante quando on apprende e usa un lingua, e il me place vider
que il ha ja plure contributiones in RhinoSpike, que Martijn recommendava.

Ma proque non colliger tote le audio in le Bibliotheca electronic in
interlingua (www.interlingua.com/e-libros) que esseva create pro
exactemente iste scopo? Le Bibliotheca cresce cata mense, ante toto con
e-libros, ma audio es multo benvenite. Colliger toto in un loco certo
fortificara www.interlingua.com e face le Bibliotheca sempre plus
valorose e interessante a visitar.

Tote le materiales in le Bibliotheca es gratuite, e on pote facilemente
discargar le assatis large collection de textos e le (ancora poc) audio
que es offerite la. Per favor, visita le Bibliotheca e selige mesme!

RhinoSpike offere un facile methodo pro registrar le audio. Postea nos
pote transferer lo in copia al Bibliotheca. Dunque, per favor, invia un
notitia, si tu adde materiales que pote esser includite anque in le
Bibliotheca electronic in interlingua, gratias.

Con mi optime salutes
Thomas
"e-bibliothecario"


--
Pro leger le archivos e pro modificar o cancellar le subscription:
http://listserv.icors.org/archives/interlng.html