INEBRIATION

Hodie existe pillulas miraculose, ma io ancora es del tempore del grande
maladias post-inebriation. Le inebriationes de antea era plus digne, perque tu
los prendeva sapiente que in le die sequente tu serea in le inferno. Ultra le
salute, era necessari corage. Le nove generationes non cognosce maladia
post-inebriation, lo que forsan explica le fallimento del vetule valores. Le
maladia post-inebriation era le proba que le retribution divin existe e que
necun placer restara sin castigamento. Cata inebriation era un defia al celo e a
su furias. E illos veniva -- nausea, pyrosis, mal de capite, dubitas existential
-- in jectos. Hodie, le inebriationes non ha le mesme majestate. Illos es
inconsequente, litteralmente.

Non es que io era un inebriato inveterate, ma io rememora tote le sabbatos de mi
adolescentia como un lucta inequal inter le cuba-libre e mi instincto de
auto-preservation. Le cuba-libre vinceva sempre. Le dominicas, de lor latere, io
rememora multo pauco, salvo le vertigine e le desiro de morte. Io jurava que io
nunquam plus biberea, ma, ante le trenta annos, "nunquam plus" dura pauco. O
alora le proxime sabbato morava tanto a arrivar que il pareva mesmo un
eternitate. Io non sape lo que le cuba-libre ha facite con mi organismo, ma
usque hodie quando io vide un bottilia de rum le digitos de mi pede se contrahe.

Tentava se toto pro evitar le maladia post-inebriation. Io prefereva un
Alka-Seltzer e duo aspirinas ante dormir. Ma in le stato in que io arrivava a
casa, non sempre io succedeva a completar le operation. A vices io dissolveva le
aspirinas in un vitro de aqua, inglutiva le Alka-Seltzer e iva ebulliente al
lecto, quando io trovava le lecto.

Ma le methodos variava. Per exemplo:

Un calice de oleo de oliva ante comenciar a biber -- le stomacho se revoltava,
tu deveniva malade e desisteva de biber.

Biber un vitro de aqua inter cata vitro de bibita -- le difficile era mantener
le regularitate. A certe mesura, tu comenciava a miscer le aqua con le bibita, e
in proportiones cata vice minor. Depost, tu passava a demandar un vitro de
altere bibita inter cata vitro de bibita.

Succo de tomate, lemon, sauce anglese, sal e pipere -- pro esser bibite in le
die sequente, in jejuno. Addente vodka illo deveniva un Bloody Mary, ma isto era
pro plus tarde.

Un bira ben gelate in le hora de eveliar se -- per alcun ration, le methodo le
plus popular.

Suppa -- credeva se que un bon suppa de gallina de nocte resolverea qualcunque
problema. Era necessari specificar que le suppa era pro ingerer, totevia multes
immergeva le facie in le platto e debeva esser succurrite in haste ante le
necamento.

Mi experientia major es con le cuba-libre, ma io cognosce altere typos de
maladia post-inebriation, al minus de audito:

Tu sapeva que le whisky scotese que tu habeva bibite in le nocte anterior era
paraguaye quando tu te eveliava sentiente te un harpa guarani. Quando le
inebriation con whisky paraguaye era multo grande, tu te sentiva como un harpa
guarani e in le deposito de instrumentos del boi^te Catitos in Assumpción.

Le pejor maladia era de gin. In le matino sequente, tu non succedeva a aperir le
duo oculos al mesme tempore. Tu aperiva un e quando tu aperiva le altere le
prime se claudeva. Tu restava con le audito tanto acute que tu audiva mesmo le
campanas del cathedral de Sancte Petro, in Roma.

Maladia de martini dulce: tu tentava levar te del lecto e flueva verso le solo
como oleo. Le pejor es que tu appelava tu matre, illa entrava currente in le
camera, glissava sur te e dislocava le pelve.

Maladia de vino: pejor era le sete. Tu te trainava usque le cocina, tentava
attinger le bottilia de aqua e traheva tote le contento del refrigerator super
te. Tu era discoperte in le matino sequente immobilizate per productos
horticultural e lactari e masticante un chouchou pro attinger le humiditate. Tu
era immediatemente dishereditate.

Maladia de cachaça: Tu te eveliava sin saper como, a pede, in un angulo del
camera. Tu morava plus que medie hora pro arrivar usque le lecto perque tu te
habeva oblidate como se camminava: era illo pede ante pede o mano ante mano?
Quando tu succedeva a cubar te, tu habeva le sensation que tu habeva lassate le
duo aures e un clavicula in le angulo. Tu reguardava al alto e videva que ille
macula con un forma vagemente human al tecto finalmente se habeva definite. Era
Boris Yeltsin e ille palpebrava verso te.

Maladia de liquor de ovos. In del pauc casos in que le lege brasilian permitte
le euthanasia.

Maladia de cognac: Tu te eveliava lucide. Tu habeva, subito, responsa pro tote
le enigmas del Universo. Le clave de toto era in tu cerebro. Debeva esser a
causa de illo que ille hominettos tentava effractar tu cassa cranian. Tu sapeva
que illo era hallucination, ma per securitate, quando tu audiva parlar de
dynamite, tu saltava del lecto rapido.

Hodie non existe plus isto. Le personas bibe, bibe e nihil eveni. In le die
sequente illes es san, ben disposite e face mesmo burlas a respecto. De tempores
in tempores alcunos del nostros se incontra e se saluta in silentio. Nos es como
le veteranos de vetule guerras rememorante le companiones cadite e nostre
heroismo anonyme. Nos ha essite in le inferno e ha retornate, integres. Plus o
minus. Un toast. E un Engov.

(VERÍSSIMO, Luis Fernando. Ed Mort : e outras histórias.)
Trad.: Ensjo.