Io ha retornate de Riverside, California, ubi io ha sentite le
tremor de terra que io habeva un timor possibilemente poterea occurrer!

Ante mi viage io pensava a me mesme que io va a duo sitos ubi le
possibilitate de tremores de terra es alte:  Salt Lake Citate e
Los Angeles. Mi viage passava per Salt Lake Citate ubi io deberea
transbordar de un aeroplano a un altere a Ontario, California. A
Salt Lake Citate il ha un falta de terra, Le Falta Wasatch, que non ha
movite desde le 19me seculo, quando il habeva movite circa 10 metros
in un direction vertical.

   Mi destination, Riverside, California similarmente esseva
multo proxime a un grande falta, le Falta de San Andreas, que es ubi
duo plattas del terra se junge, con le un del sud movente al nord-west.
Il ha de plus mesmo altere faltas active geologicamente in le vicinitate
de Riverside, que es al margine in le est de Los Angeles.  Io notava in
un mappa de Riverside que il mesmo habeva un strata nominate Strata de
San Andreas alcun pauc stratas distante de mi hotel. Assi io esseva
secur que io esseva proxime al Falta de San Andreas. De facto, secundo
un mappa a un museo proxime al hotel que io habitava, le falta existeva
solmente alcun pauc milas del hotel al margine del citate.

   Un certe anxietate passava per me mente super isto ante le viage.

Il esseva le nocte de lunedi quando a 2:47 post le medio del nocte,
io me eveliava, sentiente mi lecto treme e audiente supra me un sono
que me pareva como le sono de vapor calde quando illo passa per un
tubo.  Mais il non habeva tal tubos supra, solmente le plancos del
plano super le mie.  Le plancos tremeva e collideva con le un le altere.
Post circa 30 secundes, le tremor cessava.  Necun objectos cadeva in
mi camera.  Alcun pauc minutas plus tarde io sentiva alcun additional
tremores, mais illos non esseva forte.  A 5:45 io incendiava mi
television in le camera e io esseva presentate con un programma super
le grande tremor de terra que ha occurrite le nocte previe. De facto
a 5:57 un altere tremor comenciava in mi camera, e le annunciatores in
le television diceva que un altere tremor occurreva mesmo quando illes
parlava.  Illes monstrava lor registrator de tremores (?), cuje
pluma moveva rapidemente de un latere al altere, indicante le
existentia de un tremor de terra al momento.  Ancora nulle objectos
cadeva in mi camera.

Nonobstante le tremor esseva forte a su sito.  On diceva que illo
registrava 7.0 super le Scala Richter.  (Io opinava que il esseva
como un tremor de 3.0 super le Scala de Richter a mi location).  Le
tremor esseva locate circa 80 km al est de Riverside, CA.

Un collega mie diceva al matino que su sposa habeva telephonate le
post le tremor de 2:47, proque in Tempe, ARIZONA, circa 500 milas
(800 km) del sito del tremor, illa habeva sentite le tremor de su
proprie casa.

Si il debe haber un tremor de terra in le vicinitate de Los Angeles
de magnitude 7.0 in le Scala Richter, isto esseva le un desirabile.
Pauc o nulle destruction.  Necun injurias.

Le sol destruction occurreva in le vicinitate immediate del tremor,
in le deserto, quando un traino de passageros saltava de su linea
a causa del tremores. Ancora necun wagones del traino cadeva a lor
lateres e le pauc feritas esseva minor.

Stan Mulaik