Salvate de un fuga precipitate.

Per  Frank Dobie  (del libro 'In le campania aperite', 1931/1940)
traducite per Stanley Mulaik

   Nos audi multo super le savage e fer cavallos cavalcate per vaccheros. Il es ver que il ha e ha essite multe indominate e indominatibile cavallos in le campania. De plus, il ha essite multe cavallos mansuete amate per lor cavalcatores vaccheros. Per exemplo, il habeva Buck, qui salvava le vita de un conductor del tracia nominate Livingston.
  Durante plure noctes le tempore habeva essite tempestuose e le vaccas  agitate.  Le homines con le grege non habeva removite lor bottas in un septimana. Alcunos habeva impressionate le succo de tabaco in lor oculos pro remaner vigilente.  Le vaccas debe esser tenite.
  Un nocte pois que ille veniva del grege, Livingston se cavalcava a un section de herba dense in le vicinitate e se jaculava al terra pro dormir.
Ille lassava su cavallo, Buck, sellate, proque ille sapeva que le vaccas poteva currer a qualcunque momento. Mais ille removeva le brida e enveloppava le fin del corda de palo super su carpo a fin que Buck poterea pasturar se.
Quasi instantemente quando ille habeva toccate le terra ille dormiva.
Un pauc tempore plus tarde ille se elevava al sono de un ruito tonitrose in su aures como le sono del mar tempestuose battante se super roccas.  Le terra sub ille esseva tremente e trepidante. Le grege esseva fugiente  directe verso ille! Ante que ille esseva sufficiente allerte pro recognoscer su periculo, ille deveniva consciente que Buck stava super ille, con su pedes anterior a un latere e su pedes posterior al altere latere, facie a facie verso le vaccas demente.  Como le vaccas principal se approchava, le  cavallo de vaccas stava como 'un mur de petra' a lor fronte, e le grege divideva se, passante a cata latere de ille e lassante le homine intoccate.  Multe vices pois isto Livingston declarava que il non habeva bastante moneta in le mundo pro comprar Buck a partir de ille.


--
Pro leger le archivos e pro modificar o cancellar le subscription:
http://listserv.icors.org/archives/interlng.html