Car amicos,

*** RS in coollist: Iste discussion sur le standardisation poterea resultar per personas zelose del banir o del interdicer de usos, parolas, e constructiones grammatical in le nomine de un 'standard''orthodox' al detrimento permanente al inricchir e al aggrandir de IL.***

Iste parolas obviemente refere a mi schizzation del idea de un lista semi-aperte. Io repete mi regret de haber usate un formulation insufficiente e miscomprensibile. Permitte me precisar:

1) Io non poterea soniar de contribuer a ulle essayo de imponer o prohibir ulle usage specific de interlingua, que trova supporto in le criterios de IALA. Le lista suggerite forsan haberea como parte de su scopo le desiro de influentiar, ma nullemente de decretar. - Vole ben considerar isto ante eventualmente attaccar o disapprobar.

2) Le scopo esserea unir personas con certe visiones, interesses e desiros commun in un lista semi-aperte, ubi on evita chaos e guasto de tempore per admitter solmente personas qui declara haber le mesme visiones, interesses e desiros commun? - Es isto suspiciose? 

3) Le ligamine inter le membros esserea le desiro commun que nove interessatos in alte grado incontra ubique un interlingua satis homogenee e non un multitude de dialectos. Isto es (al minus in Scandinavia) strategicamente importante pro non immediatemente perder lor interesse. - Non es il legitime includer considerationes tactic in le effortios pro mantener le adherentes?

4) Io non parla de un homogeneitate rigide, ma de lo que nos durante le annos ha incontrate, primo in le textos de IALA e Alexander Gode, postea in p.ex. Novas de Interlingua, Currero, Heraldo, Panorama, le majoritate de manuales, dictionarios e obras litterari. - Io spera que isto es melio descriptive que mi infelice udo del parola "orthodoxe".

Bent