Le secunde die del visita de io e mi sposa a Chicago, trovate nos in
le gruppo de museodocentes e lor sposos promenante de nostre Hotel -
le elegante Palmer House ($195 per nocte! ;-() verso le station de un
traino al sud de Chicago, al campo del Universitate de Chicago.
Alla esseva nostre destination, Le Instituto Oriental.  Le traino
passava non lontan del litore de Lac Michigan, e del fenestras del
traino nos poteva observar le linea del horizonte facite per le multe
grattacelos del citate de Chicago.  Nos equalmente passava le apartamentos,
lor dorsos verso nos.  Multe de iste casas esseva vetere.  Finalmente
nos arrivava al Station a 59me strata, e comenciava a promenar secundo
un strata con un parco in le medie.  Le die esseva clar con un celo
blau, e le temperatura esseva fresc.  Nos passava tosto le edificios
del universitate, le dormitorios de studentes, un ecclesia financiate
per le familia del Rockfellers (qui ha fundate le universitate), e
brevemente nos stoppava a un casa famose proque illo ha essite
designate per Frank Lloyd Wright, le architecto famose.  Non lontan de
alla nos tosto arrivava al Instituto Oriental.  Nos esseva salutate
in le Instituto per un gruppo de docentes, que jam ha preparate se
pro nostre arrivata.  Illes nos dava alcun refectiones alora se introduceva
a nos. Nos in torno nos introduceva a illes.  Alora illes monstrava nos
un film super le museo.  Illo es un centro mundial pro le studio del
culturas antique del Oriente Medie.  Illos ha grande collectiones de
artifactos de multe sitos famose super le egyptianos,  le
hittitas, le assyrianos, le persianos, le babylonianos. A alcun vice
solmente un parve parte de lor grande collection es ponite in exhibition.
Hodie illes habeva duo exhibitiones, le un super le egyptianos e le
altere le persianos.  Alora illes nos duceva al exhibitiones, cata
docente prendente un parve gruppo de nostre docentes del museo de
Michael C. Carlos al Universitate Emory.  Illes permitteva le
photographia, mesmo le usage de flash, si illo non ennoiava altere
visitores al museo.  Io trovava que mi camera digital (date me per mi
filio prime) non exigeva le flash, que illo esseva multo sensitive
al lumine natural e le lumines in le cassas de exhibition. Io obteniva
multe photographos de lor artifactos, de lor statuo de le Pharon
Tutankhamen.  Le docente explicava que le statuo, que esseva sculpte
de un bloco de quartzite habeva un peso de circa 80 tonnas, e le
pavimento sub le statuo esseva reinfortiate pro portar le peso.
Le exhibition esseva multo interessante, specialmente le exhibition
super le systema de scriber e lor utensiles pro isto usate per le
egyptianos.  Io equalmente esseva interessate super le joieles del
egyptianos (proque io mesme ha un passatempore de facer le joieles
de argento e le lapidario).  In le grande camera del exhibition del
persianos, nos videva un progression de culturas que precedeva le
persianos, finalmente vidente le artifactos de Persopolis, le citate
capital del Persianos que Alexandre le Grande habeva destruite.

Finalmente le visita al Instituto Oriental esseva al fin.  Nos faceva
nostre regratias al docentes pro lor hospitalitate e le informationes
excellente que illes habeva date nos, e nos comenciava a promenar
a un altere strata que esseva famose pro su restaurantes e
librerias. Ante visitar un libreria nos trovava un bon restaurante
grec, e io mangiava un salata grec pro lunch.  Postea nos ambulava
trans le strata a un grandissime libreria con milles de libros
usate pro vendita. Le grande parte de iste libros esseva libros
docte al nivello universitari.  Io comprava un libro super Wittgenstein,
pro adder a mi collection de libros Wittgenstein.  Alora io e mi
sposa curreva a junger le resto de nostre partita, qui jam ha partite
verso le station del traino pro retornar al centro del citate.  Nos
jungeva un copulo qui voleva visitar le Museo Field del Historia
Natural ante retornar al hotel.  Quando nos partiva del traino al
station de que on pote promenar al Museo Field, io obteniva plure
photographos del grattacelos del citate, alora nos promenava verso
le Museo Field, que esseva trans le parco del station, circa 1000 metros.
Quando nos veniva presso le museo, nos poteva vider le laco e le
multe velieros in le laco.  Illo esseva un die belle e clar, con
un debile brisa.  Le prime cosa que io notava como nos promenava
esseva un statuo de Christopher Columbo, que io photographiava.
Le statuo habeva essite erecte pro le Exhibition Columbian in le 1890s.
Alora presso le museo esseva un grande skeleto de un dinosauro,
silhouettate contra le celo blau.  Le Museo mesme esseva un edificio
grande, in le stylo grec, con grande columnas a su fronte.

Un longe cauda de gentes nos salutava quando nos arrivava al fronte
del museo.  Nos jungeva le cauda, e poste multe minutas nos esseva
finalmente in le museo.  Le grande sala esseva plenite de milles
de gentes, multos circa le skeleto de un grande dinosauro, "Sue",
le plus grande Tyrannosaurus rex in le mundo!  Io faceva un
photographo de Sue, alora nos cercava le exhibition egyptian.
Nos lo trovava a un sala minor al latere del grande sala, e un
porta duceva nos a basso per un scala spiral a in un tumba
egyptian. Le lumine esseva obscur, mais io discoperiva que io
ancora poteva face photographos del exhibitiones in le cassos
con mi camera digital sin usar le flash!  Aqui il habeva multe
mumias, e alcun modellos que demonstrava le sequentia de
probas que un persona morte debe superpassar pro entrar le
regno del morte e vita eternal.

Post on longe periodo de attender pro un autobus libere al centro
del citate, un autobus que non jammais veniva, nos prendeva un
taxi retro al hotel.  Nos esseva fatigate!  A sex horas nos
rejungeva nostre amicos in le hall del hotel.  Alcunos voleva
vader a un restaurante mexican; mais mi sposa non es favorabile
verso le nutrimento mexican con su condimentos piccante. Assi
nos jungeva un altere copulo, le unes que habeva vadeva al
Museo Field con nos, a un restaurante de nutrimento american,
a Bennigan's. Nos habeva un longe periodo de attender ante
obtenir un tabulo pro quatro.  E le ironia esseva que le
nutrimento esseva piccante!  Nonobstante nos guadiava le
compania del altere copulo.  Le femina esseva un inseniante
del arte pensionate.  Su sposa esseva un ingeniero industrial,
qui ha graduate de Georgia Tech.  Ille esseva equalmente
pensionate.

Il esseva un belle die.

Deman, si possibile, io va relar un conto super nostre
excursion le die sequente pro vider le grattacelos de
Chicago.  Chicago es le citate in que le grattacelo
esseva initialmente inventate.

Stan Mulaik