Ante le supermercato ubi eco compra le mangiar on
ha jam comenciate vender abies natal. Il ha
venditores local e il ha tales qui compra le abies
de longe distantia. Un grande producente de abies
natal es Danmark.

Le majoritate de gentes pone le abiete in le casa
al vigilia de Natal le 24 o alcun dies antea. On
orna le abiete al vigilia nonobstante. Le
tradition de abietes natal veni de Germania e era
commun in Svedia solo al comenciamento de iste
seculo.

Certe historicos dice que on pote comparar le
arbore natal al Yggrasil, le grande arbore del
mundo e que le candelas in le arbore es le stellas
del celo.

In le Medieestate, le Sancte Johannes nos ha le
pala estival, (pala de maio) que in alcun senso
sembla corresponder al hibernal arbore natal.
Nostre patres prechristian certo celebrava le
solstitio hibernal tanto como dito estival.

On pote anque ci comprar arbores natal artificial,
de plastico, ma le fracassante majoritate compra
le cosa natural.

Habente comprate le arbore natal on lo porta a
casa. On debe seliger un belle arbore, symmetric e
con un tal forma que il es facile poner le
candelas e altere ornamentos. Multe humanos ha
omne le bandieras del paises nordic, ballas
brillante, candelas e al summito del arbore un
stella.

Multes ha anque stellas de advento in le
fenestras. Se dice que iste tradition veniva a
Svedia de Germania in le trentas....

Le plus importante die del Natal es le vigilia, le
24 de decembro. Tunc le infantes recipe le donos,
que in svedese se appella "frappos natal", proque
in vetere tempores on jectava le donos, que
soventemente era un cosa jocose, per le porta e
curreva foras! Il era multo importante que on non
videva qui dava le donos! On pulsava al porta, e
isto era le "frappos".

Nunc on face belle pachettos e scribe le nomine e
un versetto que vagemente indica lo que pote esser
le contento del pachetto. Isto es le causa que mal
poesia in svedese soventemente es appellate
"Poesia a donos natal".

Le 25 e 26 es dies de recuperation. On ha mangiate
multo e bibite ancora plus, e multes del
population vermente besonia duo dies pro refrescar
se.

In mi infantia on non era permittite visitar
altere personas al 25 de decembro.

Ah, al matino on va al eclesia pro le missa que in
paises catholic es celebrate al medienocte.

Iste matutina es generalmente le sol vice que
multes del toto visita el eclesia durante tote le
anno. Quando ego era infante ego visitava un tal
servicio divin. Isto era le sol vice. Multo
impressionante in general, ma troppo de bon hora.
Le sol se leva al 8.47 assi que toto es tenebras e
tenebras.

Cellus