d[981018] x[Allan Kiviaho]
s[Sia benvenite, Mike!]
Mike, sia benvenite al legiones gloriose de interlinguanos!
Il es agradibile de haber juvene et vital americanos al
nostre movimento nobile pro isto lingua le plus belle de omne linguas
...! (Stan es etiam vital quimvis un pauc
minus juvene, io es etiam un pauc minus juvene, 62 e
habera tosto 63).
Tu nomine, Ramsay, sona magnific in le aures de
finlandeses quia le familia Ramsay ha essite un del plus
famose in le historia de Finlandia.
Ex un encyclopedia finlandese:
RAMSAY, un familia nobile. Note in le 12nde seculo in
Scotia, ex qual illes se expandeva a Anglaterra, Francia,
Russia et Svedia. Sir John R. of Dalhousie (1580-1626)
deveniva in 1621 le conte (earl) de Holderness.
Le filio de su fratre esseva le prime conte (earl) de Dalhousie.
J.A.B. Ramsay obteneva in 1849 le titulo del marchese.
Hans Ramsay (morite 1649) entrava a servicio de Svedia,
deveniva le commandante de Bandiera del Noblesse
Finlandese ("Suomen aatelislipullinen" in finnese,
approximately un regimento de cavalleria) et obteneva in
Finlandia extensive dominios rural.
Su granfilio Klas Ramsay (morite 1683) deveniva le progenitor del
prime branca de iste stirpe (extinguite in
1879) et Anders Erik Ramsay (morite 1735) le del secunde
branca, que vive etiam nunc.
RAMSAY, Anders Edvard (nascite 1799-03-23 in Kuopio,
morite 1877-05-12 in Helsinki). Baron (Friherre in svedese,
vapaaherra in finnese), general del infanteria in 1859.
Ille participava 1825 al subjugation del rebellion de
Decabristas et ganiava le confidentia de Czar Nicolas I de
Russia. (Finlandia era un parte de Russia 1809--1917 como
un Grande Principato; salvo de ultime 20 annos Finlandia
habeva un multo alte suverenitate -- Allan).
Commandante del Guardia de Finlandia ab 1829 (Un
battalion, parte del Corpore de Armea de Guardia Russe,
Sankt Peterburg). Ille commandeva le Guardia de Finlandia
al subjugation del rebellion de Polonia 1831, organisava
le "Equipage Naval de Finlandia" (= Marina de guerra --
AK), participava al organisation de battaliones de
chassatores in le armea russe (In Russia iste battaliones
era nominate "strelkovye bataliony" = battaliones de
tiratores. Le finnos los nominava "tarkk'ampujapataljoona"
= "battalion de tiratores precise [tiratores selecte,
crack marksmen] -- AK. Ille deveniva le inspector general
de strelkovye bataliony de cata Russia in 1838.
In 1848 presidente del corte supreme del armea
finlandese, 1849 le inspector general del armea finlandese.
In le Guerra de Crimea 1854--55 ille conduceva le defensa
del bordo del mar ab Helsinki/Helsingfors a Turku/Åbo
(Contra le marinas de Anglaterra e Francia que i.a. bombardeva Helsinki
et destrueva le litoral de Finlandia.
1855 le commandante de grenadieres de Russia. 1856
adjutante general. 1862--63 le commandante del truppas
russe in Polonia.
1866 le membro del consilio militar et le inspector de
infanteria del armea russe. 1867 Le vice-commandante del
districto militar de Varsovia (Warszawa). 1873 membro del
consilio imperial.
Ille era le plus alte officiero finlandese in Russia.
RAMSAY, Anders Gustaf (1832--1910). Filio del fratre de
Anders Edvard Ramsay. Commerciante et autor. Su memoires
original (in svedese, 8 tomos!): "Från barnaår till silfverhår" (Ab
annos infantil a capillos argentin" -- AK). Le version finnese "Muistoja
lapsen ja hopeahapsen"
("Memories del infante et capillo argentin" - "hapsen"
es genitivo de "hapsi", un synonymo poetic pro capillo.
Le traduction a finnese del nomine de isto libro es
magistral -- AK).
RAMSAY, Anders Henrik (1707--82). Baron (Friherre) ab
1766. Un soldato et functionario. Serviva in le armea in
Finlandia et Francia. Governator del provincia Savo et
le proprietate seniorial Kymi ab 1765 et le del provincia
Uusimaa et Häme (Nyland et Tavastland) 1774--76. Un
favorito del rege del Svedia Gustaf III.
RAMSAY, Anders Wilhelm (1777-1808). Un soldato. Ab 1805
capitano in le regimento de infanteria del provincia
Häme (Tavastland). Quando Russia attaccava Finlandia in
1808 ille era convocate al stato major. Conduceva le
centro in le battalia de Siikajoki quando le finlandeses
fortiava un rivo. Postea le battalia de Revonlahti ille
era inviate a Stockholm pro transportar bandieras que era
capturate de inimico. In Stockholm ille era promovite a
major. Ille accompaniava como adjutante supreme un truppa auxiliar de
Vegesack a Finlandia in junio 1808. Ille
moriva a Lemu quando organisante le truppas retirante.
RAMSAY, Carl Gustaf (1783--1808). Fratre de Anders Wilhelm.
Ab 1801 como officiero in le regimento de dragones del
provincia Uusimaa (Nyland). Quando le guerra se erupteva
in 1808 ille era le adjutante del Secunde Brigada. Se
distingueva i.a. in le battalia de Siikajoki. Mortalmente
ferite in le battalia de Lapua. Iste fratres son depicte in
un poema de "Contos del insignia Stool" (Fänrik Ståls
sägner - Un collection de poemas heroic del guerra de
1808--9 per Johan Ludvig Runeberg, le autor del hymno national de
Finlandia, qui era svedophone et scribeva
omne su poemas in svedese, ille era etiam un multo bon
latinista, et - como curiositate - ille ha traducite un
plure de poemas heroic de serbos a svedese. Fänrik =
vänrikki in finnese, Fähnrich in germano, junior
lieutenant, sous-lieutenant in francese, sottotenente in
italiano -- AK).
RAMSAY, August (1859--1943). "Ver" consilio statal ab 1907.
Filio del fratre de grande Anders Edvard Ramsay. Un
economista et politico. Doctor de philosophia 1882. Rector
de Nya svenska läroverket (Nove lyceo svedese) 1883--95.
Director executive de cassa hypothecari de citates
finlandese 1895--1901. Le prime inspector de assecurantias
de Finlandia 1892--1901. Senator et le director del
comiteta de mercantias et industria 1901. Director
executive del Association pro mutual assistantia del
industria finlandese in casos de conflagration 1902--12.
Director executive in duo fabricas de tabaco 1902--12.
Le presidente del Association pro papireria finlandese
1904--12. Director general de Finska föreningsbanken (Hodie le grande
banca svedo-finlandese Merita-Nordbanken)
1913--19. membro del directorate de Suomen Sokeri
(Sucro de Finlandia) 1919--, Camera de Commercio de
Helsinki et le Central 1917--26, representante de
cavalleria (corps de knights) et noblesse al parlamento
1885--1906, membro del parlamento del Republica de
Finlandia 1919--21, ministro de financias 1919. Un de
pionieros del viages touristic de Finlandia.
RAMSAY, Georg Edvard (1834--1918). Filio del grande Anders
Edvard Ramsay. Baron (friherre), general de infanteria 1902. Commandante
del Guardia finlandese ab 1874. Ille
conduceva le Battalion de Chassatores del Guardia
Finlandese (In finnese "Suomen kaartin tarkk'ampujapatal-
joona") in le guerra inter Russia et Turchia in 1877 +++.
Postea le battalia de Gornyi Dubniak (a Plevna) ille
era promovite al commandante de Guardia Semionova (In
Russia) et 1880 al commandante-in-chef del armea
finlandese. Ille resignava in 1901 quando le armea
finlandese era suspendite. (Mi pare servia in le armea
finlandese in 1898 aut 1899, i.e. quando iste general
era le commandante-in-chef del armea finlandese).
----------------------------------------------------------
+++ AK: Le guerra inter Russia et Turchia ha essite multo
celebre in Finlandia. Il es stupide quia Finlandia et
Turchia habeva un inimico commun - Russia. Le russos
suffreva terribilissime perditas durante le assedio de
Plevna. Le massa del truppas russe habeva fusiles
inferior, modello Krnka et les jam plus inferior, Karle,
que era vetule bucca-cargate armas cum mal ballistica,
convertite a fusiles a retrocarga. Le turcos habeva le
moderne fusiles anglese (american?) Martini-Henry
(et Peabody?), que causava terribile devastation inter
le assaltante massas russe. Sed le Corpore de Armea
de Guardia Russe habeva moderne fusiles "Berdan" (un construction
american) et le battalion finlandese se
distingueva al assalto a Gornyi Dubniak cum minor perditas
que le truppas russe.
Un general finlandese, Kasimir Ehrnrooth, participava al
isto guerra como commandante de division. Ille era le sol
commandante de division qui era ferite in isto guerra - et
le sol commandante del armea russe qui nunquam transversava
Danubio, ille era colpate per un balla aberrate. Ille
deveniva un heroe in le oculos del populo de Russia et le
czar Alexander II ipse visitava le in le hospital. Il ha
in Sofia, le capital de Bulgaria, un statua magnific del
Alexander II, le "Tsar-Osvoboditel" (Le Czar Liberator).
In le pede de iste statua on pote trovar le figura del
general Ehrnrooth. Le czar appunctava general Ehrnrooth
como dictator de Bulgaria proque le prince german
Battenberg era nimis imponente como prince-regente de
Bulgaria. Le Battenberges son parentela cum le famose
familia Mountbatten de Anglaterra (Berg = Mount,
Battenberg = Battenmount, invertate Mountbatten ...). Lord
Mountbatten era un famose admiral in le Secunde Guerra
Mundial et le ultime vice-rege de India. Le terroristas
de IRA placiava un bomba in le veliero del vetule lord qui
era facite explodite in atomos in le Mar de Irlanda.
Quando Eugen Schauman assassinava Bobrikoff, le governator general russe
in Helsinki, nos le appella un combattante
de liberation sed quando un irlandese assassina un
anglese, nos le appella un terrorista. Gavrilo Princip,
le studente serb qui assassinava le prince royal
de Austria-Hungaria et su sposa in Sarajevo in 1914, es etiam nunc un
campion de liberation pro le serbos sed un terrorista pro le austrianos.
In re Serbia: Incredibilimente, quasi durante le mesme tempore quando
general finlandese Kasimir Ehrnrooth era de facto dictator de Bulgaria
un altere officiero finlandese,
colonello Becker Bey era le commandante del stato major
de Serbia, le archinimico de Bulgaria, officiosemente
facinte palnos de attacco contra Bulgaria. In 1885
Bulgaria annexava le parte del sud de Bulgaria a
Bulgaria. Le officieros russe lassava Bulgaria como
protesto (General Ehrnrooth habeva lassate Bulgaria jam anteriormente)
et Turchia concentrava un armea de 100 000
soldatos al frontiera de Bulgaria. In iste situation
Serbia attaccava Bulgaria. Il es un le grande mysterias
del historia que como era il possibile que le armea
bulgare poteva arrestar le attacco del serbos, quamquam
le plus senior officieros in le armea bulgare era capitanos
(le plus alte positiones habeva essite occupate per le
officieros russe) et le cata armea debeva marchar a pede
ab le frontiera de Turchia al le de Serbia. Et quamquam le
serbos son cognite como soldatos feroce. Le armea serbe era
battite et le victoriose truppas bulgare seavantiava al
territorio serbe. Solmente le intervention politic de
Austria-Hungaria salvava Serbia del defaite total.
A proposito, etiam Helsinki ha un statua del czar
Alexander II, al Placia de Senato, un loco le plus
importante, symbolicamente, de Finlandia. Durante le
guerras 1939--44 iste statua del czar russe era attentivemente protecte
contra le avion-bombatores RUSSE!
Ante duo dies io reguardava in television un programma
american super Sankt Peterburg. In intervista un juvene et
energetic vice-burgomaestro constatava que il es un
vergonia que Sankt Peterburg non ha un statua de Alexander
II (Il sta un cathedral magnificissime - "Hram na Krove" /
"Le Cathedral Super Sanguine" super le placia ubi Alexander
II era assassinate per un attentato cum bombas. Le vice-
burgomaestro diceva que le statua de Alexander II essera
erectate tosto - sed post alicun dies de iste intervista
le vice-burgomaestro era assassinate per le mafia russe!
|
