Kjell,
  Vostre disquisition super le possibilitates utopian de un lingua
auxiliar es ben rationate--pro aquelle puncto de vista.  Mais on pote
reimplaciar "interlingua" con "esperanto" e le resultato es le mesme.
Le puncto de vista utopian es un addition al idea de un lingua
auxiliar e plus un consequentia imaginate de su usage. Io admitte al
fortia del ideal utopian de un mundo unite, in parte per parlar un
lingua. Aqueste ideal esseva le idea de multe intellectuales europee
al initio de aqueste seculo, e le esperanto ancora porta le ideal in
aqueste regardo.  Mais le idea presuppone que le fortias de globalization
per le expansion del civilization europee (que include le statos unite,
le altere Americas, Australia, ubicunque le populos europee ha vadite),
va succeder in totalmente europeizar le mundo.  Possibilemente aquesto
ancora va occurrer.  Mais realisticamente on debe recognoscer altere
civilizationes in le mundo que va resister le europeization.  Solmente
un minor alteration del privisiones del oleo in le 21me seculo, e
le fortia del Europa e le Americas va diminuer, e un nove arabismo
va elevar se.  O le chinese vole expander lor horizontes. Eventualmente
il va haber un chinese imaginative qui va inventar un chinese basic
in litteras phonic, non necessemente roman, que va haber un grammatica
simplificate--pro tote le mundo.

  Con respecto a Russia, illo es, secundo mi fontes, un civilization
dividite.  Su intellectuales es ben europeizate, mais su vaste population
non es. Ultra le region de Russia west il ha gentes islamic e asiatic
que es tante difficile a assimilar al societate orthodoxe russe como es
le europee. Le communismo esseva un experimento in europeizar Russia,
e illo habeva fallite--io ORA pensa.  Le grande experimento de Peter
le Grande in europeizar Russia non jammais ha totalmente succedite.

  Gode habeva le philosophia que linguas es disseminate per fortias
nonlinguistic social.  E quando aqueste fortias es debile, le successo
non es guarantite.  Le utopianismo es un fortia, mais debile contra le
fortias de civilizationes ancian in lucta con le un le altere. Usa
interlingua ubi illo ha valores practic.  Como un lingua de Europa pro
tote le Europa, illo ha plus ration de esser que in altere partes del
mundo, ben que ubicunque le civilization europee se expande, interlingua
pote sequer.

Amicalmente,
Stan Mulaik