Salute a omnes!
Io habeva delite omne le messages in compuserve, alteremente io deberea
haber vidite le messages de Jay. Si Cartesius/Descartes haberea essite
registrate hic, ille certo haberea cuneate le sententia _Registratus, ergo sum._

Ci in le vicinitate io ha un templo del Eclesia de Jesu Cristo del Sanctos
del Ultime Dies, i.e. le mormones e in un altere parte del urbe il ha un
Moschea del islamitas in Uppsala. Inter ille duo il ha ecclesias luteran e
catolic.

Le ecclesia protestantic es statal in Svedia. Isto significa que si on non
ha un altere provenientia on es registrate como adherente de illo. Un
catolico naturalmente non es registrate ma es acceptite in su congregation
de ille.

In principio isto significa que quasi cata svedese adhere al mesme eclesia e
tunc il es como discuter aqua con un pisce. Ille - le pisce - non lo nota
ante que ille se trova sur le terra sic.

Il esserea un poco troppo pretentiose dicer que io es ateista, ma alque in
iste direction, tamen.

Il es impressionante que homines co-adjuta in construer eclesias etc. In
Svedia il ha un multitude de eclesias que sta vacue. Le stato nunc pensa
multo que facer con illos. In le futuro on va "divorciar" le eclesia del
stato, ma on lo face in un maniera multo svedese in isto que le ecclesia
facera su cosas e le stato le sues, ma on prendera un micre, micrissime taxa
pro le mantenimento del eclesias e pro le interrar de omne cive.

Io ha incontrate bahais, islamitas, cristianos armeniac, catolicos,
mormones, testes de Jehova, pentecostales etc. Multe annos retro io guidava
un curso de svedese in le qual il era islamitas, cristianos de varie
denomminationes e alcun alteres. Io memora specialmente un vice quando il
era un discussion in re le varie religiones. Non in le maniera que alcun
tentava convincer le alteres. On discutava comparativemente. Poteva esser un
excambio de replicas in iste stilo:
- Nos crede que Abraham habeva duo filios.
- Nos crede que ille habeva solo un. Como es isto?
- Isto es assi que....
Iste excambio de opiniones era un del momentos benedicte. Il occurre multo
rarmente que homines pote discuter varie religiones o opiniones politic sin
critar e resortar a excambios vitriolic. Compara le discussiones con
parlatores de certe linguas artificial ;-)

Un totalmente altere cosa:
Nunc on vide le comentiar del luce diurne jam a 5.30. Fantastic!

Amicalmente

Kjell Rehnstroem
Vaenortsgatan 87
S - 75264 Uppsala
email: [log in to unmask]