Istes es le summarios del sex scenas del secunde parte
(ex octo partes) del curso de conversation in
interlingua que io nunc prepara:
---
SCENA 1: Strasbourg: Catherina e Petro es in le
appartamento de Petro. Illes discute su planes pro su
viage a Geneva. In le presentia de Catherina, Petro
ascolta le messages in le registrator automatic de su
telephono.
Nos ascolta un message registrate per Alicia, su
secretaria, qui le revela que illa autorisava que on
portava via le cosas in su officio a causa de su
obligation de vader a Geneva pro su travalio.
Illa informa a Petro que illa ira directemente a
Geneva pro travaliar con ille al fin de su periodo
feriate. Petro non pare multo enthusiastic sur su
transferimento a Geneva. Ille invita Catherina, qui
trova le situation amusante, a dinar con ille, ma illa
non accepta le invitation proque illa ha multo a
facer.
---
SCENA 2: Strasbourg, in le officios de Internovas
Mundial: In iste scena Petro parla a su chef de
servicio. Ille le dice que tosto ille va a Geneva.
Il pare que Bernardo, le chef, jam sapeva isto, e ille
deveni irritate a causa del attitude apparentemente
casual de Petro sur su partita e le problemas que illo
va causar a omnes in le departamento.
Ille deveni specialmente irritate quando Petro demanda
su adjuta in su cerca pro su cafetiera pretiose. Ille
expressa su irritation assatis fortemente, e Petro
rapidemente vade via, exprimente que ille comprende
proque le chef es assatis irritate.
---
SCENA 3: Geneva, al aeroporto e in le automobile de
Carla Jackson: Catherina es in le aeroporto de
Geneva. Un femina, Carla Jackson, veni in incontro de
illa. Carla es switze, ma su marito es american e
vive in Switza.
Illa ha venite con su automobile pro portar Carla a un
hotel, e illa parla un pauco sur su vita e su marito,
qui cerca travalio in iste momento. Illa da a
Catherina le nomine de su hotel e indica a illa ubi
illo se trova.
Quando illes arriva al hotel in le centro de Geneva,
Carla exprime su surprisa quando illa discoperi que
Catherina non porta multe bagage con se.
---
SCENA 4: Geneva, le officios del holding: In iste
scena nos face le cognoscentia de Alan Tanner, qui
travalia in le edificio del holding. Il es obvie que
ille e Catherina se cognosce multo ben socialmente.
Illa demanda a ille como on pote trovar un officio in
Geneva. Alan Tanner explica que il non ha ulle spatio
in le edificio del holding ma que ille ha arrangiate
que Catherina consulta immediatemente con un agente
qui potera adjuvar la. Ma ante que Catherina parti
pro vider le agente, Alan la invita a dinar con ille.
Catherina observa que ille non ha cambiate de ulle
maniera.
---
SCENA 5: Strasbourg: Petro es in le officio de un
agente de viages. Ille face reservationes pro un volo
a Geneva. Il non ha un volo directe a ille
destination, e ille debe volar a Paris e transbordar a
un altere avion.
Le agente suggere que Petro vade a Lyon e de Lyon per
un traino de grande velocitate (TGV) a Geneva, ma
Petro prefere viagiar completemente per avion. Le
agente tunc le vende un billet a Geneva via Paris, e
Petro le da un cheque pro le viage.
---
SCENA 6: Nos vide Petro al puncto de imbarcar in le
avion pro Geneva in le aeroporto de Strasbourg.
In le aeroporto ille face le cognoscentia de un senior
Melville, qui dice que ille es un consultante de
affaires commercial. Ille ascolta un discurso assatis
detaliate de Petro sur su travalio e da a ille su
carta, dicente que, gratias a su multiple contactos
inter diverse governamentos, ille probabilemente
poterea inviar unes nove projectos a Petro.
Ille suggere finalmente que Petro invia a ille un plan
detaliate pro un projecto de ingenieria. Petro es
incantate e dice que ille inviara alique al senior
Melville multo tosto.
__________________________________________________
Do you Yahoo!?
Yahoo! Platinum - Watch CBS' NCAA March Madness, live on your desktop!
http://platinum.yahoo.com
|
