Io scribeva iste historietta ante multe annos, e como exercitio io nunc ha
traducite lo a in interlingua. Forsan illo vos placera.
Amicalmente
Ove
[log in to unmask]
Un orange blau
QUANDO IO habeva ite un breve tempore, guidate per le estranie musica, io
arrivava a un parve laco que io habeva nunquam vidite antea. Io prendeva
reposo al ripa, le pedes pendulante in le aqua calide de sol. Sur un
insuletta un poco extra le loco ubi io sedeva, sedeva un homine sonante un
instrumento bizarre. Illo semblava un fagotto, solmente multo minor, assi
que ille sin pena poteva tener lo in su manos. Ille sonava un melodia
triste, ma totevia contente; le dolor debe exister, le dolor es belle. Le
flauta se serpentava al rhytmo del musica.
Io me decideva natar al estranie musico sur le insuletta, ma quanto io
natava, tanto plus lontan semblava le destination. Ora le insuletta non
plus era visibile, e le meraviliose musica era silente. Le mar era obscur e
frigide, e le undas rolava altemente. Un banco de delphinos veniva natante.
– Qui es tu? un delphino demandava. Io era triste perque io non sapeva su
lingua, a fin que io poterea responder. – Qui es tu, qui es tu, murmurava
omne le delphinos, quando illes me lassava.
Io mergeva al fundo, e illac un puera sedeva sur un prato, sufflante a
bollettas de dente de leon, facente le semines vogar via con le vento. –
Esque anque tu vole sufflar bullas? illa demandava. Nos sufflava grande
ronde bullas, relucente in omne colores, e nos rideva, e le sol brillava, e
le alauda trillava alto in le celo.
– Deman nos va acquirer un catto, illa diceva surridente verso me, e io
videva que illa era nude, e que illa era belle. Io voleva imbraciar la.
De novo io era sol, e io prendeva un grande orange blau ab un arbore. Io
essayava pellar lo, ma le pelle era tenace, e io tirava e luctava, e
deveniva glutinose al manos e bracios usque al cubitos. Quando io
finalmente succedeva pellar le orange, io discoperiva que il habeva un
altere pelle sub le prime.
Io lo jectava via. De lontan io audiva un musica estranie, e io me decideva
persequer lo...
|
