Carissime amicos e compatriotas!

            Le prime vice que Josu Lavin me ha appellate *compatriota* io me surprendeva: es il possibile que ille es brasilian? (io me demandava).

            Le mercuridi sequente, al chat scripte de Interlingua conducite per Péter Kovács, le mysterio se clarava: Josu Lavin considera como su compatriotas tote le personas qui parla su idioma, sia le materne -- le basco -- sia le neutre e international Interlingua. Mais non solmente isto: pro esser su ver compatriota uno debe transcender, como ille mesme ha transcendite, le concepto currente de cive de un pais -- de un territorio delimitate, un terra paterne o Vaterland --, pro devenir un citatano del planeta ("le planeta es mi patria" son parolas sue), nutriente se de ideales de dimension e signification supranational ("le humanitate es un sol familia", ille lo assere).

            Io non ancora maestra Interlingua a un tal nivello, que illo me permite traducer con fidelitate e integremente le essentia de iste idea original, iste "compatriotismo" concernente tote le esseres humanos -- sin distinction del color de su pelles, de su conditiones socioeconomic, e de su locos de nascentia --, e non facente conto de ulle barrieras "national".

            Mais io securmente ha trovate belissime iste conception e me ha sentite flattate in esser invitate per ille a ingressar in su seligite gruppo de consciente *compatriotas*.

            Pro iste ration io vos preca de pardonar me si io, non movite per qualcunque intention propagandistic, continua a adressar me a vos in istes terminos.

            Cordialmente,


Carlos Alberto Santos
Aracaju - BRASIL

--
Archivos e disabonar: http://listserv.icors.org/archives/INTERLNG.html