Car amicos

Le quinte podcast de Radio Interlingua (pro decembre 2008) comencia con un novella: "Valisologia" de Alexander Gode von Aesch, qui non solmente era un eminente philologo (ille redigeva interlingua a su version final e lo publicava in 1951), ma secundo su breve obras litterari ille era tamben un eminente scriptor! E le qui lo lege es Ferenc Jeszenszky, representante hungare de interlingua, coordinator del commission linguistic de UMI, ante 24 (vinti-quatro) annos, in Taastrup, Danmark, registrate per Thomas Breinstrup per magnetophono de cassetta. 

Non multo plus tarde in le emission Ferenc parla de novo, post 24 annos, in le interview que io faceva con ille le 30 de julio 2008 in Budapest, un die ante que io volava a Svedia pro participar in le incontro nordic de interlingua. Iste vice io livra le prime parte del interview, que se occupa de questiones personal, non concernente interlingua. 

Al fin del programma Thomas Breinstrup, redactor de Panorama livra actualitates de interlingua in decembre. 

Intertanto musica hungare amusa le ascoltatores, concretemente le overtura del operetta HÁRY János del compositor hungare Zoltán Kodály, cuje methodo de inseniar musica pro infantes es divulgate in tote le mundo.

Le emission se ascolta, respectivemente se discarga immediatemente de ci:

http://www.interlingua.com/node/581

Sur le mesme pagina tamben vostre commentarios textual son benvenite!

Bon ascoltamento vos desira:

Péter Kovács
redactor

--
Archivos e disabonar: http://listserv.icors.org/archives/INTERLNG.html