Car amicos,

Esque nos debe excluder certe themas de nostre lista? In principio no!
Tamen, io crede, il ha alicun themas periculose. Io opina que discussiones
super politica e religion pote esser multo interessante, ma que in certe
casos illos pote causar irritation indesirabile. Alora on debe esser multo
caute in le maniera de exprimer su opinion super illos, specialmente quando
il se age del convictiones religiose de alteres.

Discussiones super interlingua ipse, super questiones grammatical e  super
parolas, pote esser interessante e utile. Ma anque hic io vide un periculo.
Quando le discussion dura troppo e deveni sempre plus detaliate con
innumerabile repetitiones de lo que on ha jam dicite in previe messages
e quando finalmente le discussion se restringe a duo o tres personas, io
crede que le momento ha venite de cessar lo in le lista INTERLNG, e de
continuar lo in un correspondentia private inter iste duo o tres personas.

Personalmente io es interessate in discussiones super questiones del
grammatica e del vocabulario de interlingua. E io comprende que anque
alteres ha le mesme interesse. Pro participar in tal discussiones il me pare
necessari que on dispone de alicun libros fundamental de interlingua,
p.e. del grammatica de Gode/Blair e del IED. Cetero on deberea esser
informate super le grande numeros de vocabulos que, durante plus de
45 annos, plure interlinguistas ha addite al stock del IED. Nos deberea
evitar discussiones super questiones que in le passato on jam ha discutite
e solvite.

Quanto al forma del messages io debe dicer que io detesta le citationes
in litteras italic ab le messages de alteres. Vos va haber constatate que
nunquam io face tal citationes. Io opina que le legibilitate de un message
augmenta considerabilemente, si io resume in pauc parolas le message
al qual on vole reager.

Io opina que nos non debe crear un nove lista pro interessatos in questiones
de grammatica e de lexicographia. Iste themas debe restar un parte del lista
INTERLNG., ma in un forma moderate.

Salutes amical de Piet