REPORTO FORMAL (ma non troppo...) e super toto factual,
del Cursos Intensive e del
7-e Incontro Nordic in Loftadalens folkhogskola, Åsa, Svedia,
que es un schola-internato, un Collegio popular pro adultos..
Bon, mesmo excellent cameras, locales e repastos (multes...e ric).
Un professora del schola, Lisbeth Fryklund, participava in le curso
pro novicios e esseva un amabile "face-toto" pro nos omnes.
Cinquanta personas participava in le Cursos, le 26-28 de julio 2000
e/o le Incontro, le 28-30 de julio.
Le cursistas habeva lor origine in Finlandia, Hungaria, Nederland,
Norvegia, Polonia e in Svedia Pro le Incontro arrivava un gruppo
de Danmark
Un curso (A) pro novicios con Ingvar Stenstrom como instructor.
Manual: Stenstrom: "I-a - instrumento moderne de communication
international". Tote le grammatica secundo le prime dece-duo
lectiones del libro esseva tractate..
Le etate del studentes variava inter 80 e 17! (Un problema peda-
gogic - crede me!)
Un curso (B) de conversation, preparate e guidate per Jan Armann
e animate per Simona Sunel, professora gymnasial de latino de
Romania e Piet Cleij, le secr gen. de UMI.
Le secunde die se formava un tertie gruppo, pro conversation,
consistente de illes qui habeva jam congnoscentia previe de
I-a ex le gruppo de novicios e de alcunos que trovava troppo
avantiate le curso B, sub le guidantia de Barbara Rubinstein.
Un tal flexibilitate es sovente desirabile.
Le presentia de homines de linguas diverse faceva natural le uso
de Interlingua e le conversation in Interlingua deveniva de plus
in plus vivide. Le difficile passo inter comprension passive e
le parlar e pensar active non es un limine insuperabile in I-a,
sed cata studente de qualcunque lingua besonia un incoragiamento,
mesmo un poco de "fortiamento" pro passar iste limine.
Le amonta de tortura necessari tamen esseva minimal a Loftadalen..
CONCLUSION: Invita "estranieros" a tal cursos pro haber un bon
motivation pro practicar le lingua immediatemente!
LE 7-E INCONTRO NORDIC.
Iste incontros esseva initiate in 1988 es se tene cata duo annos, inter le
Conferentias International. **Nos nordicos calidemente recommenda
le institution de tal incontros regional in altere partes del mundo!**
P.ex. Incontros Balcanic, Franco-germano-nederlandese, Interamerican etc.
- nunquam sin instruction formal!
**Un memento pro organisatores: Non subestima le labor con le pre-
parationes! Io comenciava le 27 de dec. 1999 e Jan Armann e io
haveva postea milles a detalios a arrangiar, Comencia le preparationes
multe tempore in avantia!!1 E demanda que on decide su participation
in bon tempore ante le data del conferentia!**
Le daneses arriva con Bent Andersen, le juvene familia Breinstrup, le
pionero Jorgen Kofod-Jensen, pres. de Dansk Interlingua-Union e
Arne Pedersen, redactor technic de dictionarios. Ubi "Th" es, ibi es
activitate!! In "pep(si)-talks" enthusiasmante ille nos inspira,
presentante
un vaste serie de propositiones pro le anno del 50-e jubileo.
Si _su_ energia esseva condividite per tote le 50 participantes, nos
tosto viderea Interlingua un lingua establite in le mentes del scandinavos.
Un REUNION ANNUAL, (necessarimente) longe de SSI furava multe
tempore del participation del svedeses in le deliberationes re le realisa-
tion del planos nordic. Jesper Olsson, presidente de UMI, es tamben
vice-pres. de SSI e sub su guidantia, "dictatorialmente efficace" on
succedeva solver plure problemas. Le resultato es i.a. un nove consilio
de SSI:
Pres.:Jan Armann,
Vice-pres.: Jesper Olsson
Secr.: Ingvar Stenstrom
Tresorero, distributor del magazines e web-master de
<http://www.interlingua.nu>: Gheorghe Petrineanu
(Nove adresse de SSI: Ekgatan 10, SE-587 31 LINKOPING,
<[log in to unmask]> )
Functionario pro PR e incontros: Barbara Rubinstein.
Revisores: Mats Fredmark e Magnus Larsson.
SSI regratia cordialmente le ex-consilieros Claes Bredvad-Jensen,
Satoko Fujimoro-Berger e Kjell Rehnstrom, qui omnes ha servite
durante multe annos!
DISTRACTIONES: Duo excursiones alternative: uno a un village
inalterate del 18-e seculo o uno al fortalessa medieval de Varberg.
(Le grande stratega e historico militar Allan Kiviaho prefereva le
fortalessa...)
LE PUBLICITATE obtenite es un del resultatos le plus importante
de nostre conferentias e incontros. Inter mi preparationes esseva
le distribution a un cinquantena de medios massive de info re le evento.
Interviews con me e altere participantes esseva publicate in
duo jornales quotidian, "Hallands Nyheter" (2000-07-27) e
"Hallandsposten" (2000-07-28), ambe articulos grande e multo
positive. (Per iste duo jornales tote le provincia de Halland es
coperite.) Un interview con me in Radio Halland (2000-07-27)
e un reportage in le television regional "Västnytt"
de 3 minutas (2000-07-28).
Le 1 de augusto Barbara Rubinstein esseva interviewate in le
programma "Liv" (Le vita) in le programma P 4 del radio durante
10 minutas. Breve mentiones in altere jornales.
Le organisationes national del paises nordic nunc planifica campanias
pro establir cursos pro assecurar le affluentia a nostre movimento
de nove homines capace a usar I-a activemente.
Que vos omnes face lo mesme!
Factualmente, con salutes amical,
Ingvar
Ingvar Stenström,
Vegagatan 12, S-432 36 Varberg, Svedia
Tel. +46-/0/340-15053
<[log in to unmask]>
<[log in to unmask]> <[log in to unmask]>
<http://www.interlingua.com> <http://www.interlingua.nu>
ICQ UIN nr. 26993308
|
